Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
POLITIKE
“Rama të mbajë përgjegjësi”/ Këlliçi: Ngriti industrinë e betonit bashkë me Veliajn! Të hetohet ngjarja
PiranjatPërditësimi i fundit 15 Prill 2026, 14:23
Deputeti demokrat Belind Këlliçi akuzoi kryeministrin Edi Rama si përgjegjësin kryesor të pasojës së zjarrit katastrofik që ta në pallatin shumëkatësh pranë Farmacisë 10, dje në Tiranë, duke shkaktuar dëme të mëdha dhe të lënduar.
Ai shprehet se bashkë me kryebashkiakun Erion Veliaj ata ndërtuan industrinë e betonit me qëllime fitimi, teksa bëri thirrje për qytetarët që të ngrihen në protestë dhe më 17 prill t’i bahskohen asaj kombëtare në kryeqytet që do mbajë opozita.
“Pavarësisht kësaj, çdo qytetar e di sot se dy njerëz janë përgjegjësit kryesorë të asaj katastrofe, Edi Rama dhe Erion Veliaj. Eshtë prej dorës së tyre, prej urdhrave të tyre që është ngritur ky sistem, me ndërtime për të marrë sa më shumë para dhe pa pasur parasysh interesat e qytetarëve, sigurinë e cilësinë e tyre të jetës. Edi Rama dhe Erion Veliaj kanë ngritur industrinë e betonit, që ka zaptuar çdo hapësirë, për të kënaqur klientët e për të shtuar pasurinë e tyre. Një industri kriminale që nuk ofron elementët bazike të sigurisë për njerëzit, ku duhet sakrifica e heroizmi nga disa zjarrfikës e punonjës policie për të evituar tragjedinë”, shprehet deputeti i PD mes të tjerash në reagimin e tij në rrjetin social.
Këlliçi e cilëson ngjarjen si një katastrofë të rëndë, ku dhjetëra banorë rrezikuan jetën dhe humbën pasurinë, duke kërkuar një hetim të shpejtë dhe të plotë nga organet e drejtësisë për të nxjerrë përpara përgjegjësisë çdo shkelës.
“Unë nxis hetim serioz e të plotë nga Prokuroria. Por është e qartë se autorët kryesorë të kësaj maskarade, janë mbi ligjin dhe nuk do të hetohen”, vijon ai.
Deputeti i opozitës bëri thirrje për përgjegjësi politike nga ana e qeverisë dhe autoriteteve vendore, ndërsa ftoi qytetarët të reagojnë publikisht, duke përmendur edhe një datë proteste të paralajmëruar më 17 prill.
Reagimi i plotë i Belind Këlliçit:
“Ka dy përgjegjës për katastrofën dje në Tiranë, Edi Rama dhe Erion Veliaj!
Ngjarja e rëndë dje në një zonë shumë të banuar në mes të Tiranës, ku dhjetëra banorë rrezikuan jetën dhe humbën pasurinë për shkak të zjarrit që pushtoi një kompleks për disa orë, duhet të hetohet me seriozitet dhe me shpejtësi nga Prokuroria. Të dalin shkelësit në secilën hallkë dhe të vihen para drejtësisë menjëherë!
Pavarësisht kësaj, çdo qytetar e di sot se dy njerëz janë përgjegjësit kryesorë të asaj katastrofe, Edi Rama dhe Erion Veliaj. Eshtë prej dorës së tyre, prej urdhrave të tyre që është ngritur ky sistem, me ndërtime për të marrë sa më shumë para dhe pa pasur parasysh interesat e qytetarëve, sigurinë e cilësinë e tyre të jetës.
Edi Rama dhe Erion Veliaj kanë ngritur industrinë e betonit, që ka zaptuar çdo hapësirë, për të kënaqur klientët e për të shtuar pasurinë e tyre.
Një industri kriminale që nuk ofron elementët bazike të sigurisë për njerëzit, ku duhet sakrifica e heroizmi nga disa zjarrfikës e punonjës policie për të evituar tragjedinë.
Kur Erion Veliaj dhe Edi Rama e lejojnë të njëjtin ndërtues (famozin Armand Lilo) të shtojë 7 kate pa leje mu para zyrës së Kryebashkiakut, në mes të sheshit Skënderbej, a presin vallë qytetarët që bashkia dhe qeveria të kenë ushtruar kontroll për standardet e lejes, apo të cilësisë së punimeve në një kompleks banimi?!
Unë nxis hetim serioz e të plotë nga Prokuroria. Por është e qartë se autorët kryesorë të kësaj maskarade, janë mbi ligjin dhe nuk do të hetohen.
Edi Rama duhet të mbajë përgjegjësi para qytetarëve.
Dhe pasnesër, të premten, datë 17 prill, në orën 19:00, është dita që qytetarët ta bëjnë atë përgjegjës për këtë dramë e shumë të tjera që ai po i shkakton vendit”.
