Një ngjarje e rëndë ka ndodhur në qytetin e Korçës, ku një 62-vjeçar ka humbur jetën pasi është ...
POLITIKE
Reagimi i Veliajt/ Pse kryebashkiaku shan Prokurorin Olsi Dado dhe Dumanin e përmend vetëm si "siglues"?
M.B.Përditësimi i fundit 10 Shkurt 2025, 21:29
TIRANA- Kryebashkiaku Erion Veliaj reagoi në orët e mbrëmjes së sotme për arrestimin e tij ku veç familjes, kolegëve të bashkisë dhe partisë, nuk la pa përmendur dhe hetuesit e SPAK. Nëse fjalët për familjarët përmbanin nota keqardhjeje, fjalët për partinë dhe bashkinë përmbanin nota "shpjeguese", fjalët për SPAK mbartnin të tjera nuanca.
Për dy firmtarët e kërkesës për arrestimin e tij, prokurorin Olsi Dado dhe për kryeprokurorin Altin Dumani, Veliaj mesa duket nuk ka përshtypje të njëjtë. Ai, dukshëm i veçon, njërit duke i hedhur mbi supe një mori akuzash dhe tjetrin duke e kursyer më shumë.
Kryebashkiaku që në fjalinë e parë të reagimit të tij e etiketon prokurorin Olsi Dadon, si "një prokuror lunatik". Veliaj thotë se Dado është një fyerje e gjallë e inteligjencës njerëzore. Veç kësaj, kryebashkiaku thotë se nuk ka për detyrë më të heshtë për çfarë i kanë parë sytë në sjelljen me familjen tij dhe për çfarë i kanë dëgjuar veshët nën çatinë e SPAK-ut.
"Nuk më befason ky fund absurd i këtij kapitulli të gjatë zvarritjeje sa në gojët e qenërisë mediatike dhe sa në duart e një prokurori lunatik, që është një fyerje e gjallë e inteligjencës njerëzore. Por, ky ishte vetëm kapitulli i parë. Tani unë nuk kam më detyrimin të hesht për çfarë më kanë parë sytë në sjelljen me familjen time dhe më kanë dëgjuar veshët nën çatinë e SPAK-ut. Kam respektuar, si gjithë të tjerët, vijën tonë politike, jo komente për një proces të hapur nga drejtësia", thotë Veliaj në reagim.
Teksa shpreh keqardhjen për kolegët e bashkëpunëtorët e Bashkisë së Tiranës, Veliaj iu drejtohet atyre duke thë se do që ta dinë që nuk ka, sipas tij, asnjë lidhje me ato që i etiketon si idiotësi të shkruara në paçavuren fatkeqësisht të sigluar edhe nga Altin Dumani.
"Më vjen keq për të gjithë bashkëpunëtorët, kolegët, punonjësit e Bashkisë së Tiranës dhe dua ta dinë që nuk kam unë asnjë lidhje me idiotësitë e shkruara në paçavuren fatkeqësisht të sigluar edhe nga Altin Dumani. Më vjen keq për motrat dhe vëllezërit e Partisë Socialiste dhe për kryetarin, që pas kaq vitesh beteja të përbashkëta elektorale, nëse nuk do të më ketë në krah këtë fushatë, siç duket gjasat, përderisa më fusin në burg pa gjyq 3 muaj para zgjedhjeve", thuhet në reagimin e Veliajt.
Dukshëm, me një lidhëz "dhe", Veliaj e përfshin Dumanin si një shtesë në fjalinë e tij. Kreun e SPAK, Veliaj e cilëson vetëm si "siglues" duke i kursyer shumë nga etiketimet e rënda që vendos mbi prokurorin e çështjes së tij, Olsi Dado.
