Një tjetër tentativë e negociatorëve për të bindur 35-vjeçarin të dorëzohet është zhvilluar pak minut...
POLITIKE
Zhulali: Skandali i AKSHI-t rrezikon sigurinë kombëtare dhe të NATO-s, të dhënat në duar kriminale
PiranjatPërditësimi i fundit 29 Janar 2026, 20:54
Drejtuesja e Departamentit të Marrëdhënieve me Jashtë në Partinë Demokratike, Ilda Zhulali, ka ngritur alarmin për një cenim serioz të sigurisë kombëtare pas skandalit të AKSHI-t dhe dështimit të sistemit ‘Diella’. Zhulali deklaroi se rrjedhja e të dhënave nuk kufizohet në një sektor të vetëm, por prek të gjithë sistemin shtetëror të informacionit, përfshirë edhe sistemet e integruara me NATO-n dhe Bashkimin Evropian.
‘Janë të dhënat në nivel shtetëror dhe këtu përfshihet çdo gjë, sepse këto janë sisteme që janë të ndërtuara dhe integrohen me njëra-tjetrën dhe të gjitha pastaj rrinë në një qendër. Dhe me sa kemi parë dhe çfarë është zbuluar dhe nga dosjet hetimore, është që në të gjitha këto sisteme ka një rrjedhje informacioni, pra informacioni del, regjistrohet diku tjetër, pra këto depozitohen në mënyrë paralele dhe pastaj këto përdoren për forma të ndryshme dhe për motive të ndryshme. Për të shantazhuar njerëz, për t'u marrë para, për të ndryshuar të dhëna, për t'i përdorur në favor të njërit apo tjetrit.
Pra flasim për të gjithë sistemin e të dhënave shtetërore dhe këtu flasim dhe për sistemin e të dhënave në kuadër të NATO-s, i cili është një sistem i mbyllur, i kriptuar, i cili normalisht është, duhet të ketë disa parametra sigurie që të funksionojë, sepse Shqipëria si vend anëtar merr të dhëna dhe transmeton të dhëna. Po ashtu dhe me Bashkimin Evropian. Dhe nëse ky sistem është i cenuar, atëherë ti ke cenuar të gjithë sigurinë e Shteteve të Bashkuara të Amerikës.
Pra aq më keq që flasim për rënien në dorë të këtyre të dhënave, të këtyre të dhënave në duart e personave që cilësohen si pjesë e grupeve të strukturuara kriminale, apo që janë të lidhura me trafikun e drogës dhe ne nuk e dimë tjetër se në çfarë influence mund të jenë. Sepse Shqipëria si pjesë e Ballkanit Perëndimor, nuk është ndonjë e fshehtë, ndonjë sekret që ta themi, është, si të thuash, tokë pjellore edhe tërheqëse edhe për aktorë të tjerë malinj si Rusia, Kina, apo vende të tjera që janë dashakeqe. Edhe gjeopolitik, po, po për të gjitha këto arsye, që mundet, ka pra persona që janë të interesuar që t'i shtien në dorë këto të dhëna dhe më pas të abuzojnë me to. Kështu që ne nuk i kemi të dhënat se çfarë ka ndodhur, po dimë që shteti shqiptar në bashkëpunim me aleatët, amerikanët, me vendet anëtare të Bashkimit Evropian, ka hedhur miliona dhe miliona euro, mund të themi dhe miliarda tashmë, për me një investim kaq të madh në kaq vite, për sigurinë kibernetike, për sigurinë e këtyre sistemeve dhe në fakt këto dalin sikur të jenë krejtësisht të zhbëra.
Dhe, jo vetëm të keqpërdorur vetë. Puna është kush i ka këto të dhëna në dorë dhe kush i administron. Po ju kujtoj për shembull, përpara shumë vitesh se u dha si lajm, pastaj iku shpejt, në Ministrinë e Punëve të Jashtme, në administrimin e të dhënave të NATO-s ishte punësuar motra e atij vrasësit, Dumanit, që ishte si i penduar.
Mendoni se si duket sikur këta persona nuk mund të arrijnë kurrë në majat e shtetit, po ja që arrijnë, ë, kështu dalëngadalë, edhe pa u kuptuar. Dhe ky është shteti që ka ndërtuar Edi Rama.
Patjetër që ka një sistem. E para ka një sistem alarmi dhe unë mendoj që ky sistem alarmi është ngritur tashmë dhe kjo i është bërë e qartë autoriteteve shqiptare. Mendoj që ky sistem alarmi është ngritur qoftë në kuadër të NATO-s, në, ë, siç e thashë për shkak të kalimit të atyre të dhënave, transmetimit të tyre dhe që duhet të jenë në duar të sigurta, por edhe për të dhënat e tjera, të cilat gjithsesi, edhe nëse nuk janë të dhëna sensitive në kuptimin e, atyre të përdorimit të aleancës ushtarake, politike ushtarake të NATO-s, përsëri përbëjnë një kërcënim të aleancës për sa kohë janë të dhëna që mund të bien në duart e aktorëve malinj, siç e përmenda, dhe që mund të keqpërdoren dhe mund të kthehen të trondisin një vend të tërë.
Për shembull, ka patur raste përpara, ju kujtoj disa raste çfarë ka ndodhur. ë, qe një rast në Maqedoninë e Veriut ku u pa se disa, ishin shpërndarë disa pashaporta që ishin të klonuara, të personave të zakonshëm që jetonin në disa fshatra të Maqedonisë, dhe këto u ishin dhënë disa personave të tjerë që ishin persona me rrezikshmëri shumë të lartë, që mund të kryenin edhe veprimtari të rrezikshme për sigurinë e vendit, terrorizëm.
Pra, si kishin arritur të ndodhnin këto gjëra? Pikërisht duke gjetur këto dobësitë e sistemeve dixhitale, edhe duke penetruar deri tek prodhimi i dokumenteve të identitetit, duke pasur pra dy dokumente paralel dhe kjo u zbulua në Maqedoninë e Veriut dhe e njëjta gjë rrezikon pra të përdoret edhe këtu’, tha ndër të tjera, Ilda Zhulali.
