Sali Berisha deklaron se Belinda Balluku duhet të ishte prapa hekurave dhe jo të ecte e lirë. Në një komunikim me gazetarët, kre...
SPORT
“Ekipi do të konkurrojë fort në Kategorinë e Parë”. Besëlidhja ngjitet si kampione, trajneri Plori tregon çelësin e suksesit
PiranjatPërditësimi i fundit 28 Prill 2026, 15:00
Besëlidhja Lezhë ka fituar kurorën e kampiones së Kategoria e Dytë, pasi në finalen e zhvilluar në Durrës triumfoi me rezultatin 2-0 ndaj Oriku. Skuadra lezhjane, nën drejtimin e trajnerit Elvis Plori, zhvilloi një paraqitje dominuese dhe vulosi një sezon të jashtëzakonshëm duke siguruar ngjitjen në Kategorinë e Parë si kampione.
Goli i parë i finales u realizua në pjesën e parë nga azerbajxhanasi Bajramali Gurbanov, ndërsa goli i dytë erdhi në pjesën e dytë nga Jasmin Raboshta, i cili dhuroi një moment spektakolar me një roveshatë të mrekullueshme, duke vulosur triumfin e Besëlidhjes. Ky sukses konfirmon edhe një herë vlerat e skuadrës lezhjane, por mbi të gjitha të trajnerit Elvis Plori, i cili njihet për eksperiencën dhe aftësinë për të ngjitur skuadrat në kategori më të larta. Edhe këtë herë, tekniku shkodran ia doli të përmbushë objektivin, duke rikthyer Besëlidhjen në Kategorinë e Parë pas një mungese jo të logjikshme. Pas fitimit të trofeut, Elvis Plori u shpreh shumë i lumtur për arritjen e skuadrës: “Ishte mbyllja më e mirë që mund të bënim pas një sezoni kaq pozitiv. Shpresoja që të mos gabonim as në finale, jo vetëm për të fituar trofeun, por edhe që të mos shkonte dëm gjithë puna që lojtarët kanë bërë gjatë gjithë sezonit”, ishin fjalët e para të trajnerit 47-vjeçar.
I pyetur për çelësin e suksesit, Plori theksoi se gjithçka erdhi si rezultat i punës sistematike dhe harmonisë brenda skuadrës: “Çelësi i suksesit ishte puna sistematike gjatë gjithë sezonit, harmonia e jashtëzakonshme në grup dhe cilësia që kishin lojtarët tanë. U desh kohë për të konsoliduar grupin, sepse në javët e para patëm luhatje, por më pas nuk u ndalëm deri në realizimin e objektivave. Besëlidhja e meritonte rikthimin në Kategorinë e Parë dhe ta arrinte këtë si kampione”, deklaroi Plori. Trajneri shkodran vlerësoi gjithashtu faktin që ka mundur të arrijë suksese të njëpasnjëshme me skuadra të ndryshme, duke i ngjitur në kategori më të larta: “Kur një skuadër ka objektiva të qarta dhe punon fort për t’i arritur, suksesi vjen. Besëlidhja e ka merituar plotësisht këtë ngjitje. Jam shumë i lumtur që u bëra pjesë e këtij klubi dhe shpresoj që të bëjmë mirë edhe në Kategorinë e Parë”, tha ai.
Ndërsa për objektivat e sezonit të ardhshëm, Plori la të kuptohet se klubi nuk do të mjaftohet vetëm me rikthimin në Kategorinë e Parë: “Tani është momenti për të festuar këtë sukses. Më pas do të ulemi me drejtuesit për të projektuar sezonin e ardhshëm. Besoj se Besëlidhja do të konkurrojë fort edhe në Kategorinë e Parë dhe do të ndërtojmë një skuadër edhe më të fortë. Patjetër që do të ketë ndërhyrje në merkato për të synuar objektiva të tjerë të rëndësishëm”, u shpreh tekniku. Në fund, trajneri Elvis Plori bëri edhe dedikimin e tij për këtë sukses historik: “Këtë sukses dua t’ua dedikoj tifozëve tanë të zjarrtë, sepse futbolli luhet për ta. Natyrisht edhe familjes, sepse puna e trajnerit kërkon shumë sakrifica. Një falënderim i madh shkon edhe për lojtarët dhe stafin, të cilët dhanë maksimumin gjatë gjithë sezonit. Jam plotësisht i kënaqur me gjithçka kemi arritur së bashku”.
