Tenderi 50 milionë euro për mirëmbajtjen e akseve rrugore kombëtare është është shndërruar në një skandal...
SPORT
Pas zhgënjimit me Tiranën, Egnatia kërkon hakmarrje ndaj Flamurtarit
PiranjatPërditësimi i fundit 4 Shkurt 2026, 14:42
Egnatia po përpiqet të lërë pas humbjen me Tiranën dhe ecurinë jo të mirë që ka shfaqur që nga fillimi i vitit 2026, ku skuadra ende nuk ka shijuar fitoren.
Edhe pse situata nuk është optimale, kampionët e Rrogozhinës mbeten ende në vendin e dytë të renditjes, vetëm tre pikë larg Vllaznisë kryesuese, dhe me një distancë të sigurt nga ekipet që kërcënojnë për një vend në “Final 4”. Për këtë arsye, në kampin rrogozhinas po përpiqen të shohin përpara dhe të lënë pas problemet e ndeshjes së fundit, ku pati pretendime për vendimet e gjyqtarit gjatë sfidës me Tiranën. Qëndrimi është i qartë: fokusi i plotë është rikthimi te rezultatet pozitive dhe mbajtja e vendit të lartë në renditje.
FLAMURTARI – Këtë të premte, Egnatia do të përballet me një tjetër sfidë të vështirë, këtë herë ndaj Flamurtarit. Ironikisht, pak ditë më parë ata u ndeshën me vendin e fundit, Tiranën, dhe tashmë e gjejnë veten përsëri përballë një ekipi të fundit në renditje.
Pas përvojës së hidhur me bardheblutë të dielën e kaluar, në Rrogozhinë nuk duan të mbështeten më vetëm te renditja, por kërkojnë një fitore që t’i rigjallërojë: Flamurtari, nga ana tjetër, ka treguar se mund të bëjë surpriza të pakëndshme në shtëpi, duke marrë rezultate pozitive edhe ndaj ekipeve më të forta. Madje, ka qenë vetë Egnatia që e ka provuar në kurriz, kur u mund fazën e dytë në Rrogozhinë. Për këtë arsye, mobilizimi në kampin e drejtuar nga Edlir Tetova është maksimal: një hap fals mund të rëndonte edhe më shumë pozitat e Egnatias në tabelë.
SKUADRA – Për këtë ndeshje, pritet që trajneri Tetova të ketë të gjithë lojtarët në dispozicion dhe të përfitojë edhe nga afrimet e fundit gjatë merkatos. Sulmuesi Alfonso De Oliveira Rodriguez, i cili në ndeshjen me Tiranën qëndroi në stol, mund të marrë minuta të rëndësishme për të shfrytëzuar aftësitë e tij në sulm.
Edhe Daniel Adjesa, i ardhur më parë, ka filluar të marrë minuta dhe ka shënuar gol, duke i dhënë Tetovës më shumë mundësi taktike për të surprizuar kundërshtarin. Nga ana tjetër, portieri Levan Tandilashvili do të duhet të presë për debutim, pasi Mario Dajsinani ka siguruar tashmë vendin në portë. Megjithatë, prania e tij në stolin e Egnatias i siguron trajnerit një alternativë të vlefshme në rast nevoje. Në këtë situatë, sfida ndaj Flamurtarit nuk është vetëm një test i forcës së skuadrës, por edhe një mundësi për Egnatian që të rikthejë moralin dhe të tregojë se është ende një pretendent serioz për vendet e larta.
