Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
SPORT
Shqipëria humb një legjendë: Amir Abrashi var fanellën kuqezi pas 12 viteve të paharrueshme
PiranjatPërditësimi i fundit 17 Nëntor 2025, 11:37
Mesfushori i njohur Amir Abrashi ka vendosur të japë fund karrierës së tij me Kombëtaren e Shqipërisë në moshën 35-vjeçare, duke mbyllur një kapitull të artë që zgjati plot 12 vite.
Abrashi iu bashkua kuqezinjve në vitin 2013 dhe debutoi me fitore 2-0 ndaj Armenisë. Gjatë karrierës së tij kombëtare, ai zhvilloi 51 ndeshje, shënoi një gol dhe dhuroi katër asistime, duke u shndërruar në një nga liderët më të rëndësishëm të skuadrës.
Largimi i tij shënon fundin e një epoke për Kombëtaren, pasi Abrashi ka qenë pjesë kyçe e shumë sfidave historike dhe është konsideruar shpesh si “Zemra dhe Shpirti i Kombëtares”, duke marrë pjesë në dy Kampionate Evropiane, në 2016 dhe 2024.
Në një deklaratë prekëse për tifozët, Abrashi shkruan:
“Fanella kuqezi ka qenë dhe do të mbetet gjithmonë nderi më i madh i jetës sime… Ju keni qenë forca ime dhe arsyeja pse gjithmonë kam dhënë gjithçka në fushë… Zemra ime mbetet përgjithmonë kuqezi.”
Ai falënderoi gjithashtu presidentin Duka, trajnerët e skuadrës dhe stafin e FSHF-së për mbështetjen gjatë gjithë rrugëtimit të tij.
Karriera e Abrashit me Shqipërinë do të mbahet mend jo vetëm për performancën në fushë, por edhe për profesionalizmin, sakrificën dhe lidershipin e tij, duke lënë një trashëgimi të paharrueshme tek brezat e ardhshëm të lojtarëve kuqezi.
