Kryeministri Edi Rama ka pranuar se mes protestuesve të muajve të fundit kanë pasur edhe anëtarë, mbështetës dhe votues t&e...
AKTUALITET
Doganat sekuestruan vetëm…14 shishe verë mijëra euroshe në vinotekën e Ergys Agasit. Mbi 1 mld lekë dëm Buxhetit të Shtetit
PiranjatPërditësimi i fundit 23 Dhjetor 2025, 21:01
Drejtoria e Doganave ka marrë vetëm 14 shishe verë nga i gjithë koleksioni që biznesmeni kontrovers Ergys Agasi kishte në vinotekën e tij. Pasi Byroja Kombëtare e Hetimit, bëri kontrollin në banesën e Agasit, njoftoi drejtorinë e Doganave për verën e gjetur, për shkak se ishte e kontrabanduar dhe pa pullë fiskale. Dogana ka shkuar këtë mbrëmje në banesën e Agasit dhe ka mbajtur procesverbalin se sa shishe vere ndodheshin në banesë.
Por atë mbrëmje pas agjentëve të Doganës, në banesën e Agasit ka hyrë dhe kushëriri i Ergys Agasit, Eno Agasi dhe e ka larguar verën nga aty. Në momentin që agjentët e Drejtorisë së Doganave, bashkë me anti-kontrabandën shkuan në mëngjes për të sekuestruar verën, gjetën vetëm 14 shishe verë.
Nga vera e futur në mënyrë kontrabandë në vendin tonë, dëmi ndaj buxhetit të shtetit është mbi 1 miliardë lekë. Këtu përfshihen taksa doganore, akciza si dhe TVSH-ja. Vera e shtrenjtë që kushton mijëra euro ishte pa pullë fiskale dhe e futur kontrabandë në vendin tonë. Por Agasi arriti që ta largojë atë nga banesa e vetë nëpërmjet kushëririt, Eno Agasi, i cili është shpallur në kërkim nga Prokuroria e Tiranës.
Hetimet e SPAK për tenderat e AKSH-it
Prokuroria e Posaçme ka lëshuar urdhër arreste për drejtoreshën e AKSHI-t, Mirilinda Karçanaj, Ergys Agasin dhe biznesmenin Ermal Beqiraj. Për drejtoreshën e AKSHI-it, Mirlinda Kërçanaj, GJKKO ka caktuar masën e sigurisë “arrest shtëpie”, ndërsa për Ergys Agasi dhe biznesmenin Ermal Beqiri janë caktuar masat e sigurisë “arrest me burg”. Më datë 16 dhjetor, dy skuadra me agjentë të BKH-së, shoqëruar dhe nga patrulla të policisë së Shtetit, zbarkuan në ambientet në pronësi te biznesmenit Agasi. Bëhet fjalë për kontrollin e 4 vendeve, banesave në Durrës e Tiranë, si dhe bizneset që zotërohen Ergys Agasi, shkruan Dosja.
Po ashtu është dhënë masë pezullimi nga detyra dhe për zëvendësdrejtorin e Policisë së Tiranës, Erion Ismaili. SPAK gjithsej ka vendosur në masë sigurie 8 persona që janë Ergys Agasi, Ermal Beqiraj, Mirilinda Karçanaj, Hava Delibashi, Erion Ismaili, Andis Papa, G.H dhe Rogers Rryta. Akuzat kryesore të SPAK janë grup i strukturuar kriminal, shkelje e barazisë në tendera si dhe heqje e paligjshme e lirisë. Prokuroria e posaçme prej gati një viti po hetonte procedurat e 12 tenderave, që dyshohet se janë bërë në shkelje.
Ndërkohë personat e përmendur më sipër, por dhe zyrtarë të tjerë, për të cilët është dhënë masa, por që ende nuk dihen emrat e tyre, akuzohen për shkelje barazisë në tendera, korrupsion, shpërdorim detyre dhe pastrim parash.Drejtoresha e Agjencisë Kombëtare të Shoqërisë së Informacionit (AKSHI), Mirlinda Karçanaj u paraqit më 3 dhjetor në Prokurorinë e Posaçme në kuadër të një hetimi për abuzime me tenderat e zhvilluar nga institucioni që ajo drejton. Ndërsa në banesa dhe zyrat e biznesit të Ergys Agasit janë kontrolluar me urdhër të SPAK në muajin qershor.
