Shtetet e Bashkuara kanë vendosur tarifa të reja ndaj 60 partnerëve të tyre kryesorë tregtarë, duke argumentuar se këto ven...
AKTUALITET
Hita viziton efektivin e plagosur: Sakrifica e punonjësve do të vlerësohet maksimalisht
PiranjatPërditësimi i fundit 27 Maj 2026, 14:13
Drejtori i Përgjithshëm i Policisë së Shtetit, Skender Hita, vizitoi sot në Spitalin e Traumës një nga punonjësit e policisë të dëmtuar gjatë një operacioni antidrogë në qarkun e Korçës.
Efektivi i DVP Korçë mbeti i plagosur së bashku me një koleg, pasi automjeti i tyre u përplas qëllimisht nga një person i dyshuar për shpërndarje të lëndëve narkotike, i cili më pas u arrestua nga policia.
Gjatë vizitës në spital, Hita uroi shërim të shpejtë për dy efektivët dhe vlerësoi profesionalizmin dhe përgjegjshmërinë e treguar në përmbushje të detyrës.
“Përmbushja e detyrës dhe e misionit tonë ka edhe rrezikun me vete, por kur kemi zgjedhur këtë mision, kemi marrë parasysh se të jesh në shërbim të ligjit dhe qytetarëve ka edhe sakrificë”, deklaroi Drejtori i Përgjithshëm.
Ai theksoi se sakrifica dhe përkushtimi i çdo punonjësi policie do të vlerësohen maksimalisht dhe garantoi mbështetje të plotë institucionale për trajtimin mjekësor dhe financiar të efektivëve të dëmtuar në krye të detyrës.
Ngjarja ndodhi në aksin rrugor Korçë–Pogradec, pranë fshatit Lumalas, ku dy punonjësit e policisë konstatuan një person të dyshuar për shpërndarje të lëndëve narkotike dhe tentuan ta ndalonin.
Sipas policisë, 21-vjeçari, në përpjekje për t’i shpëtuar arrestimit, goditi qëllimisht automjetin me të cilin udhëtonin efektivët, duke shkaktuar plagosjen e tyre.
Në vijim të operacionit u arrestuan në flagrancë dy shtetas të moshave 19 dhe 21 vjeç, ndërsa u shpall në kërkim një 27-vjeçar, pronar i një lokali ku dyshohet se shpërndahej lëndë narkotike dhe ushtrohej aktivitet i paligjshëm i lojërave të fatit.
Si prova materiale u sekuestruan doza të lëndës së dyshuar narkotike cannabis sativa dhe kokainë, si dhe një tavolinë pokeri.
