Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
AKTUALITET
Kolonjë/ Banorët e Qinamit protestë kundër vendosjes së paneleve diellore: Ky fshat ka mbaruar, do ikim
PiranjatPërditësimi i fundit 29 Nëntor 2025, 15:21
Banorët e fshatit Qinam në Kolonjë janë ngritur këtë të shtunë në protestë kundër vendosjes së paneleve diellore në kullotat që prej dekadash shërbejnë si burim jetese për dhjetëra familje blegtorësh.
Ata shprehen se humbja e kullotave do të thotë humbje e plotë e aktivitetit të tyre ekonomik dhe largim i detyruar nga fshati. Një nga banorët thotë se vendosja e paneleve rrezikon të zhdukë përfundimisht 10 familjet e fundit që jetojnë vetëm nga blegtoria.
“Jam fermer dhe kemi problem nëse zihen kullotat nga panelet diellore. Edhe këto dhjetë familje që jemi fermerë do të ikim sepse këtu nuk rrihet”, tha një banor.
Banorët thonë se bashkia ka zhvilluar diskutime, por vendimmarrja po i injoron krejtësisht shqetësimet e tyre. Ata ndihen të braktisur dhe të pa përfaqësuar. Sipas tyre, kullotat dhe arat që po synohen për t’u zëvendësuar me panele diellore janë të ndara mes familjeve të fshatit prej brezash.
Ata theksojnë se aty është ushqimi bazë për rreth 3000-4000 krerë bagëti, mes tyre 600 lopë, dhe se humbja e tyre do të bllokojë të gjithë ciklin bujqësor e blegtoral të zonës.
“Ky është problem i madh për ne sepse kemi shumë krerë dhe nuk kemi ku t’i çojmë”. Këtu kemi 3000- 4000 bagëti, ku të shkojmë nëse vendosen panelet diellore. Ku t’i çojmë gjatë dimrit; Nëse ngrihen panelet ky fshat ka mbaruar, ose do të zhbëhet; Jemi fshat i mbaruar, të ikim edhe ne si fëmijët. T’i shesim bagëtitë", thanë disa prej banorëve.
Banorët e fshatit Qinam kërkojnë që institucionet të ndërhyjnë për të mbrojtur kullotat e tyre.
