Kryeministri në detyrë i Kosovës, Albin Kurti, ka reaguar ndaj ceremonisë me nderime shtetërore të organizuar në Serbi p&eu...
AKTUALITET
Moti i keq, disa zona rrezikojnë përmbytjen në qarkun e Shkodrës
PiranjatPërditësimi i fundit 5 Janar 2026, 11:15
Prej dy ditësh, Shkodra është përfshirë nën kushtet atmosferike jo të favorshme, të tilla si reshje shiu dhe dëbore, të cilat kanë sjellë dhe pasoja.
Nga një njoftim zyrtar për situatën aktuale të qarkut të Shkodrës, raportohet se në Bashkinë Vau i Dejës, nuk ka reshje shiu, por të tilla janë regjistruar përgjatës natës në Malësinë e Madhe.
Sakaq, në Koplik uji i pranishëm në rrugë po fillon të tërhiqet gradualisht, duke shënuar kështu një përmirësim të situatës.
Kritike mbetet situata në fshatin Kamicë, ku si pasojë e prurjeve nga Përroi i Thatë, ka dëmtime në rrugën që kalon mbi të, duke sjellë vështirësi të përkohshme në qarkullim dhe në lidhjen Kamicë–Flakë. Strukturat vendore janë në ndjekje të situatës.
Në Fushë-Arrëz dhe Pukë vijojnë reshjet e shiut, të shoqëruara dhe me erëra të forta, por nuk raportohen problematika.
Rrezik për përmbytje mbeten zona të Lezhës, pasi prurjet në lumenj dhe përrenj janë shtuar. Nivelet e ujit në Buna, Drin, Kir, Gjadër dhe Rezervuarin Shtodër janë normale, ndërsa hidrovoret e Velipojës ndodhen në gadishmëri të plotë.
Sa i përket akseve rrugore, në segmentin Bogë–Theth është regjistruar dëborë në zonën e Qafë Thores dhe qarkullimi kërkon kujdes të shtuar. Në aksin Hani i Hotit–Dogana Vermosh ka pasur rënie inertesh, por grupet e punës janë në terren dhe po kryejnë pastrimin.
Gjithashtu, janë evidentuar disa ndërprerje të energjisë elektrike në njësi administrative të bashkive Shkodër, Vau i Dejës dhe Fushë-Arrëz, ndërsa ekipet e OSHEE-së po punojnë në terren për rikthimin e furnizimit.
Raportohet se strukturat e emergjencave civile janë në gatishmëri të plotë dhe situata po monitorohet në vijimësi, teksa bëhet thirrje për qytetarët që të tregojnë kujdes të shtuar e të bashkëpunojnë me autoritetet lokale.
Reshjet e dëborës në qarkun e Shkodrës nuk janë të pazakonta gjatë dimrit, por në vitet e fundit ka pasur raste ku bora dhe ngricat kanë shkaktuar vështirësi në qarkullim dhe ndërprerje të energjisë elektrike.
