George Desmond Kamurasi mund të kalojë së shpejti nga dorezat e portierit te një kurorë mbretërore. Kapiteni 36-vjeçar i ...
AKTUALITET
Nuk ndalen mashtrimet në emër të e-Albania, AKSK apel për vigjilencë: Mos klikoni linqet e dyshimta
PiranjatPërditësimi i fundit 22 Maj 2026, 17:54
Autoriteti Kombëtar për Sigurinë Kibernetike ka dalë me një njoftim urgjent, ku paralajmëron qytetarët për raste mashtrimi online përmes faqeve false që imitojnë platformën zyrtare e-Albania.
Sipas AKSK-së, është identifikuar një rast phishing i shpërndarë kryesisht në rrjetin social Facebook, ku përdoruesit ridrejtohen në faqe të rreme me qëllim vjedhjen e të dhënave personale dhe kredencialeve të aksesit.
“Menjëherë pas identifikimit të rastit, AKSK ka ndërmarrë masat përkatëse dhe në bashkëpunim me Drejtorinë për Hetimin e Krimeve Kibernetike në Policinë e Shtetit, domain-et dhe adresat IP të përdorura në këtë aktivitet keqdashës janë dërguar për bllokim pranë AKEP”, thuhet në njoftim.
Autoriteti u bën thirrje qytetarëve të tregojnë kujdes maksimal gjatë navigimit online dhe të shmangin klikimin në linke të dyshimta.
“BËNI KUJDES! Mos klikoni në linke të dyshimta që ju vijnë në rrjetet sociale apo aplikacione komunikimi. Mos vendosni të dhënat tuaja personale apo bankare në faqe të pa verifikuara. Verifikoni gjithmonë adresën zyrtare të platformave përpara se të identifikoheni”, thekson AKSK.
Në reagim sqarohet gjithashtu se “Platforma zyrtare e e-Albania aksesohet vetëm përmes adresave zyrtare institucionale. Sulmet phishing synojnë të mashtrojnë qytetarët përmes imitimit të faqeve të njohura dhe kërkojnë vigjilencë të shtuar nga çdo përdorues online”.
