Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
AKTUALITET
Pajisje përgjimi dhe spiunazhi në Portin e Durrësit, çfarë ndodhi me tre italianët dhe pse heshin autoritetet shqiptare?
PiranjatPërditësimi i fundit 7 Dhjetor 2025, 12:04
Një ditë pas lajmit të bujshëm se në portin e Durrësit ishin bllokuar pajisje spiunazhi dhe përgjimi, autoritetet shqiptare nuk kanë dhënë asnjë deklarim zyrtar për ngjarjen.
Pajisjet iu sekuestruar disa shtetasve italianë që kishin mbërritur me traget në portin e Durrësit natën e së premtes rreth orës 23:00 dhe do të riktheheshin mëngjesin e së shtunës rreth orës 07:00 po me traget drejt Italisë.
Personat u paraqitën si punonjës së Guardia Di Finanza italiane. Por, kur kanë kaluar 24 orë nga ngjarja, autoritetet shqiptare nuk kanë dhënë asnjë informacion zyrtar, qoftë një komunikatë shpjeguese nga ana e policisë lokale.
Zbulimi i pajisjeve
Ka qenë ora 23:00 e mbrëmjes së të premtes kur kontrolluesit në Portin e Durrësit pikasën një automjet ku udhëtonin tre shtetas italianë. Ata mbërritën në vendin tonë me tragetin e linjës Ankona–Durrës. Brenda automjetit, më vonë, autoritetet do të zbulonin dhe do të bllokonin pajisje përgjimi të sofistikuara.
Dy nga tre personat që u rikthyen mbrapsht në Itali mësohet se janë agjentë të Guardia di Finanza, megjithëse zyrtarisht autoritetet shqiptare nuk kanë treguar asnjë detaj. Shtetasit italianë u morën në pyetje dhe më pas u lanë të lirë.
Zbulimi i pajisjeve do të duhet të kishte alarmuar autoritetet aq më tepër kur hynin nga një aks i rëndësishëm për trafikun e kokainës dhe për të cilin opozita ka denoncuar vazhdimisht se nuk është kapur asnjë gram drogë prej disa vitesh. Disa pyetje mbeten ende pa përgjigje, si; kë do të përgjonin pajisjes?
A janë përdorur pajisje të tilla në vendin tonë dhe nëse po kush ishte shënjestra? A ka dalë automjeti nga Porti për t’u rikthyer dhe, nëse kjo ka ndodhur, në cilat zona është ndaluar? Çfarë përfaqësojnë tre personat që janë lejuar të largohen? A janë të përfshirë punonjësit e Guardia di Finanza?
A do të duhej të lejoheshin të iknin nga vendi derisa çështja të sqarohej? A ka pasur ndonjë subjekt të rëndësishëm në tragetin me të cilin ata mbërritën nga Italia në Durrës? Heshtja e autoriteteve shqiptare vetëm sa shton mjegullnajën në gjithë këtë histori.
