Kreu i Grupit Parlamentar të Partisë Demokratike, Gazment Bardhi, ka lëshuar akuza të forta ndaj ekzekutivit menjëherë pas mbled...
AKTUALITET
Qytetarët 'shpërthejnë' kundër zhvendosjes së Kadastrës në Tiranë: Vendim i padrejtë, do të dalim në protestë
PiranjatPërditësimi i fundit 27 Janar 2026, 11:46
Vendimi për zhvendosjen e Kadastrës nga Vlora në Tiranë ka shkaktuar zemërim te qytetarët, të cilët e konsiderojnë këtë lëvizje një goditje të rëndë për komunitetin. Një banor i Vlorës, i prekur drejtpërdrejt nga ky vendim, e cilësoi atë si një “varr për Vlorën”, duke shprehur frustrimin e tij dhe të shumë të tjerëve pas viteve të tëra zvarritjesh burokratike.
Sipas tij, prej 10 deri në 15 vitesh qytetarët përballen me një kalvar të pafund me dokumente “lart e poshtë”, pa marrë asnjëherë një zgjidhje.
Ai thekson se edhe kur zyrat ishin në Vlorë, shërbimi ishte minimal dhe qytetarët ndiheshin të papërfillur.
“Edhe këta që rrinë këtu nuk na shërbejnë, po fare”, shprehet ai, duke argumentuar se largimi i zyrave në kryeqytet do ta përkeqësojë situatën në mënyrë drastike.
Për shumë banorë, veçanërisht për të moshuarit dhe ata me probleme shëndetësore, udhëtimi drejt Tiranës është i pamundur. “Unë s’dal dot as në Fier, jo të vemi në Tiranë. Jam i sëmurë me zemër”, rrëfen qytetari, duke ilustruar vështirësitë praktike që do të sjellë ky ndryshim.
Ai tregon gjithashtu barrën financiare që ka mbajtur, duke deklaruar se ka paguar shuma të konsiderueshme për aplikime pa rezultat. “102 mijë lekë kam paguar unë”, thotë ai, duke vënë në dukje se paratë dhe koha e shpenzuar kanë shkuar dëm.
Përballë kësaj situate, qytetarët paralajmërojnë përshkallëzim të protestave. Duke u ndjerë të braktisur dhe pa asnjë rrugëzgjidhje, ata shprehin gatishmërinë për të bllokuar rrugët kryesore të qytetit.
“Ne jemi për të dalë atje në xhade. Të bllokojmë atje te Sheshi i Flamurit”, deklaron banori, duke reflektuar një ndjenjë të përgjithshme dëshpërimi dhe vendosmërie për të mos lejuar që zëri i tyre të shuhet.
"Tani është vendosur që do ikin në Tiranë këta, zyrat. Po, kjo është varr për neve, për Vlorën. Neve e kemi, po vemi nja 10 vjet e 15 vjet me dokumenta këtu lart e poshtë.
Po na shkatërrojnë Vlorën. Edhe nuk na përfill njeri fare. E që vijmë edhe këtu, edhe këta që rrinë këtu ore, nuk na shërbejnë. Po fare.
Të bëhet këtu o vëlla, të paktën edhe këtu që rrimë neve, edhe këtu s'marrim informacion me thënë të drejtën. Se janë 100 veta aty punojnë, edhe neve nuk na përfaqëson asnjë njeri. As zgjidh me asnjë gjë. Po tani që do iki në Tiranë? Tashi do jetë e ngjesh fare, skëterrë. Skëterrë.
Si t'i zgjidhim ne hallet tona? Prandaj ja, neve po vijmë këtu për të marrë ato çikë shtëpi që kemi, atë pronë kemi atje, se do vdesim, kujt do t'ua lëmë? Kujt do t'ia lëmë o vëlla? Se do lëmë prangë fëmijëve.
Se thotë edhe fëmija, ore ke, ke kaq vjet, s'ke bërë një dokument për shtëpi? Turp, dhunë. Dhunë. Dhunë i madh. Ne jemi për të dalë atje në xhade, s'do rrimë kot këtu ore.
Të bllokojmë atje te Sheshi i Flamurit. Dhe vijmë atje. Po unë kam paguar, e kam mbajtur pensionin çikë e çikë, e kam paguar ato faturat, taksat. Po bëj taksa, faturat që që bëja ato aplikimet. 102 mijë lekë. Po, 102 mijë kam paguar unë. I ke mundësitë të ikësh në Tiranë tani?
Çfarë mundësie? Unë s'dal dot në Fier se jam i sëmurë me zemër. Lene mo Tiranën, nga bie? Që s'kam dalë tutje po. Ne nuk zgjidhim problem këtu, nuk zgjidh, do zgjidh në Tiranë? Kush na pyet në Tiranë neve"?
