Numri i aksidenteve rrugore në Shqipëri ka vijuar të rritet gjatë vitit 2026, duke arritur në 1,090 aksidente në periudh&eu...
BOTA
Anthropic paralajmëron për rrezikun e AI-së: Mund të kërcënojë ekzistencën e njerëzimit
PiranjatPërditësimi i fundit 27 October 2026, 14:28
Inteligjenca artificiale mund të përbëjë një rrezik ekzistencial për njerëzimin nëse zhvillohet pa masa të forta sigurie. Paralajmërimi vjen nga kompania amerikane Anthropic, zhvilluese e Claude, e cila po përgatitet për një hyrje historike në bursë. Pavarësisht humbjeve që tejkalojnë 80 miliardë dollarë, vlerësimi i kompanisë mund të kapërcejë 1.8 trilionë dollarë.
Inteligjenca artificiale mund të shkaktojë pasoja katastrofike, deri në rrezikimin e ekzistencës së njerëzimit. Paralajmërimi vjen nga kompania amerikane Anthropic, zhvilluese e chatbot-it Claude, teksa përgatitet për një nga hyrjet më të mëdha në bursë në histori.
Në dokumentet e dorëzuara për listimin në bursën amerikane Nasdaq, kompania paralajmëron se sistemet e avancuara të inteligjencës artificiale mund të dalin jashtë kontrollit nëse nuk shoqërohen me masa të forta sigurie dhe mbikëqyrjeje.
Sipas Anthropic, rreziqet bëhen veçanërisht serioze nëse teknologjia keqpërdoret, shndërrohet në armë ose lejohet të veprojë me një shkallë të lartë autonomie.
Paralajmërimi vjen në një moment kur kompania synon një vlerësim që mund të tejkalojë 1.8 trilionë dollarë, vlerën fillestare të listimit të SpaceX.
Anthropic ka njoftuar se aksionet e saj do të tregtohen në Nasdaq me simbolin ANT, por ende nuk ka përcaktuar datën e listimit apo çmimin e tyre.
Vetëm në gjashtëmujorin e parë të vitit, kompania raportoi 16.3 miliardë dollarë të ardhura, por edhe humbje që tejkalojnë 80 miliardë dollarë.
E themeluar pesë vjet më parë nga Dario Amodei, motra e tij Daniela dhe pesë bashkëpunëtorë, Anthropic është kthyer në një nga kompanitë kryesore të garës globale për inteligjencën artificiale.
Por zhvillimi i shpejtë i teknologjisë ka shtuar shqetësimet për sigurinë.
Në dokumentet e saj, kompania përmend rreziqet që lidhen me sulmet kibernetike, përdorimin e inteligjencës artificiale nga persona të cenueshëm dhe përgjegjësinë ligjore për veprimet e sistemeve autonome.
Megjithatë, Anthropic thekson se teknologjia mund të sjellë edhe përfitime të jashtëzakonshme, duke përshpejtuar kërkimet shkencore dhe zhvillimin e trajtimeve për sëmundje si kanceri dhe Alzheimeri.
Sipas kompanisë, inteligjenca artificiale mund të revolucionarizojë ekonominë dhe mjekësinë, por vetëm nëse zhvillimi i saj shoqërohet me garanci të forta sigurie.
Hyrja e Anthropic në bursë pritet të jetë një provë e rëndësishme për besimin e investitorëve te industria e inteligjencës artificiale, në një kohë kur potenciali ekonomik i saj shoqërohet me paralajmërime gjithnjë e më serioze për rreziqet që mbart.
