Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
BOTA
Anulimi i tarifave, kancelari gjerman reagon pas vendimit të Trump: NATO është ndërtuar mbi besimin e aleatëve
PiranjatPërditësimi i fundit 22 Janar 2026, 17:30
Kancelari gjerman, Friedrich Merz, ka mirëpritur sot në Davos zotimin e presidentit amerikan Donald Trump se nuk do të përdorë forcë ushtarake për të marrë Groenlandën, duke e cilësuar këtë si “lajm të mirë”, pas vendimit të Trumpit për të hequr dorë nga tarifat e planifikuara për shkurt ndaj disa vendeve evropiane për këtë çështje.
Megjithatë, Merz paralajmëroi se Evropa duhet të ushtrojë fuqinë e saj, pasi bota po bëhet gjithnjë e më e rrezikshme. Ai vuri në dukje se politika e jashtme e Uashingtonit po “ndryshon radikalisht”, duke tronditur themelet e rendit ndërkombëtar.
“Ky botë e re e fuqive të mëdha po ndërtohet mbi fuqi, forcë dhe, kur vjen puna, mbi dhunë. Nuk është një vend i qetë”, tha Merz gjatë fjalimit të tij në Forumin Ekonomik Botëror në Davos.
Ai u bëri thirrje vendeve evropiane që të rrisin shpenzimet për mbrojtje dhe konkurrencën ekonomike për të përballuar këto ndryshime “tektonike” në rendin global. Në të njëjtën kohë, Merz këshilloi gjermanët dhe evropianët të mos heqin dorë nga aleanca transatlantike dhe NATO-ja.
“Pavarësisht gjithë frustrimit dhe zemërimit të muajve të fundit, mos u nxitoni ta cilësoni si të humbur partneritetin transatlantik. Ne evropianët, ne gjermanët, e dimë sa e çmuar është besimi mbi të cilin bazohet NATO-ja”, u shpreh Merz.
Ai foli gjithashtu për rreziqet e rivalitetit të ri midis fuqive të mëdha: “Bota ku numërohet vetëm fuqia është e rrezikshme, së pari për shtetet e vogla, pastaj për fuqitë e mesme dhe në fund edhe për të mëdhatë. Nuk e them këtë lehtë. Në shekullin e 20-të, vendi im Gjermania shkoi në këtë rrugë deri në fundin e hidhur dhe e tërhoqi botën në një humnerë të zezë”.
Për të përballuar këto sfida, Merz propozoi një plan me tre shtylla për Evropën: investime masive në mbrojtje, rritje të konkurrencës ekonomike dhe unitet. Ai theksoi gjithashtu nevojën për marrëveshje të reja tregtare globale për të forcuar ekonominë evropiane, duke u kundërvënë politikave tarifore të Trumpit.
“Ambiciet tregtare të Evropës janë të qarta: duam të jemi aleanca që ofron tregje të hapura dhe mundësi tregtie,” tha Merz, duke shtuar se Evropa duhet të qëndrojë kundër praktikave të padrejta të sponsorizuara nga shteti, proteksionizmit të lëndëve të para, ndalimeve teknologjike dhe tarifave arbitrare.
