Një kanal në WhatsApp, i krijuar për të mbështetur fushatën e rizgjedhjes së Luiz Inácio Lula da Silvës, po vler&...
BOTA
Bordi i Paqes: Çarmatosja e Hamasit, kusht për paqen në Lindjen e Mesme
PiranjatPërditësimi i fundit 19 Maj 2026, 20:30
Bordi i Paqes, organizmi ndërkombëtar që mbikëqyr armëpushimin në Gaza, i krijuar me mbështetjen e Shteteve të Bashkuara, ku merr pjesë edhe Shqipëria dhe Kosova, do t’i kërkojë Këshillit të Sigurimit të OKB-së të ushtrojë presion ndaj Hamasit për t’u çarmatosur. Kjo bëhet e ditur në një raport të siguruar nga Associated Press, i cili pritet të diskutohet të enjten gjatë mbledhjes së Këshillit të Sigurimit për situatën në Lindjen e Mesme.
Dokumenti thekson se pengesa kryesore për zbatimin e plotë të marrëveshjes mbetet refuzimi i Hamasit për të pranuar çarmatim të verifikueshëm, për të hequr dorë nga kontrolli ushtarak dhe për të lejuar një tranzicion civil real në Gaza.
Një diplomat i njohur me përmbajtjen e raportit konfirmoi autenticitetin e tij në kushte anonimiteti, pasi dokumenti ende nuk është bërë publik. Plani amerikan me 20 pika për armëpushimin parashikon dorëzimin e armëve nga Hamasi, shkatërrimin e rrjetit të tuneleve, tërheqjen graduale të forcave izraelite nga Gaza, krijimin e një qeverie të re teknokrate palestineze, vendosjen e një force ndërkombëtare sigurie dhe rindërtimin e territorit pas më shumë se dy vitesh lufte.
Javën e kaluar, kreu i Bordit të Paqes dhe ish-emisari i OKB-së për Lindjen e Mesme, Nickolay Mladenov, pranoi se procesi i armëpushimit ka ngecur që prej hyrjes në fuqi në tetor. Sipas tij, ngërçi mbi çarmatimin e Hamasit ka paralizuar përparimin e marrëveshjes. Në raport thuhet se rindërtimi i Gazës nuk mund të nisë pa heqjen dorë nga armët nga grupet e armatosura.
“Faktori kritik, ai që zhbllokon çdo element tjetër të planit, mbetet arritja e një marrëveshjeje për zbatimin e plotë të planit, që përfshin çarmatimin total të Hamasit dhe grupeve të tjera të armatosura në Gaza”, theksohet në dokument.
Hamasi e hodhi poshtë raportin, duke deklaruar se ai përmban “pasaktësi” dhe se përpiqet të justifikojë Izraelin për shkeljet e përditshme të armëpushimit në Gaza. Grupi palestinez akuzoi Izraelin se nuk ka respektuar pjesën më të madhe të detyrimeve të marrëveshjes, përfshirë kufizimet ndaj hyrjes së ndihmave humanitare dhe materialeve të nevojshme për rindërtimin e infrastrukturës bazë dhe strehimin e popullsisë së zhvendosur.
Sipas Hamasit, insistimi për çarmatim është një përpjekje për të sabotuar marrëveshjen e armëpushimit. Organizata i bëri thirrje Këshillit të Sigurimit dhe Mladenovit të detyrojnë Izraelin të zbatojë detyrimet e tij sipas fazës së parë të marrëveshjes, veçanërisht ndalimin e sulmeve të përditshme ndaj palestinezëve në Gaza.
Raporti përmend gjithashtu shkelje pothuajse të përditshme të armëpushimit, disa prej tyre të konsideruara serioze, me pasoja të rënda humanitare për civilët. Dokumenti thekson se familjet në Gaza vazhdojnë të jetojnë në frikë dhe se pengesat ndaj ndihmave humanitare mbeten të mëdha. Ndërkohë, ushtria izraelite vazhdon sulmet ajrore dhe ka zgjeruar kontrollin territorial në Gaza, duke mbajtur aktualisht rreth 60% të territorit.
Kushtet humanitare në Gaza përshkruhen si dramatike, me shumicën e rreth dy milionë banorëve që jetojnë në kampe me mungesë shërbimesh bazë. Mladenov deklaroi se zyra e tij po merret çdo ditë me shkeljet nga të dyja palët, por përsëriti se çarmatimi i Hamasit mbetet një kusht “i panegociueshëm” për ecjen përpara të procesit të paqes.
