Tensionet e para janë shënuar gjatë protestës së 54-të para Kuvendit të Shqipërisë. Disa prej protestuesve kan&eu...
BOTA
I dënuar me 32 vite burg për vrasje/ Shqiptari "çmend" britanikët, mbledh 20 mijë paund duke dalë live në "Tik Tok" nga qelia
PiranjatPërditësimi i fundit 25 Janar 2026, 16:25
Rasti i Eugert Merizajt ka shkaktuar reagime dhe zemërim të fortë në Britani, pasi u zbulua se ai ka përfituar rreth 20 mijë paund nga një transmetim i drejtpërdrejtë në TikTok, i realizuar nga brenda qelisë së tij në një burg të Manchesterit.
Sipas raportimeve, Merizaj arriti të sigurojë këtë shumë në vetëm shtatë minuta, duke përdorur një telefon celular të futur në mënyrë të paligjshme në ambientet e burgut. Ai mori pjesë në një “ndeshje” në TikTok, një format ku dy përdorues transmetojnë njëkohësisht dhe nxisin ndjekësit të dërgojnë dhurata virtuale.
Këto dhurata paguhen nga përdoruesit dhe shndërrohen në pikë, ndërsa fitues shpallet ai që grumbullon më shumë pikë, të cilat më pas konvertohen në para. Gjatë transmetimit, Merizaj dëgjohet duke u bërë thirrje ndjekësve të dërgojnë më shumë dhurata dhe të shpërndajnë videon për të rritur shikueshmërinë, ndërkohë që lexon me zë emrat e kontribuuesve, sipas The Sun.
Merizaj përdorte disa llogari në TikTok, ndërsa ajo kryesore kishte mbi 45 mijë ndjekës. Kjo i mundësoi të grumbullonte gjithsej 5,429,625 pikë, me një vlerë të përllogaritur rreth 20 mijë paund. Dyshohet se të ardhurat janë depozituar në llogarinë bankare të një miku të tij jashtë burgut.
Në transmetime të tjera live, Merizaj shfaqet duke pirë cigare dhe i veshur me rroba firmato. Në një komunikim me ndjekësit, ai shprehet me krenari se autoritetet nuk mund ta deportojnë në Shqipëri pa firmën e tij.
Merizaj është dënuar në vitin 2022 me 32 vite burg për vrasjen e Hemawand Ali Hussein, i cili u qëllua për vdekje nga afër brenda një banese në Hartlepool në vitin 2019.
Sipas rregullave të miratuara vitin e kaluar në Mbretërinë e Bashkuar, shtetasit e huaj të dënuar për vepra penale parashikohet të deportohen pasi të kenë vuajtur një pjesë të dënimit. Megjithatë, në nëntor të vitit të kaluar, Gjykata e Fierit njohu vendimin e gjykatës britanike dhe pranoi që Merizaj të vuajë dënimin në Shqipëri. Ai pritet të transferohet në burgun e Peqinit, pasi t’i zbritet koha e vuajtur në Mbretërinë e Bashkuar.
Lidhur me këtë rast, politikani opozitar Nick Timothy reagoi duke deklaruar se sistemi i drejtësisë duhet të mbrojë qytetarët dhe të ndëshkojë kriminelët, duke theksuar se situata të tilla nuk duhet të tolerohen. Pas sinjalizimit të rastit, TikTok njoftoi se ka bllokuar të gjitha llogaritë e përdorura nga Merizaj dhe ka pezulluar mundësinë e tërheqjes së fondeve.
Nga ana tjetër, një përfaqësues i Ministrisë britanike të Drejtësisë i tha gazetës The Sun se sjellja është plotësisht e papranueshme, se përmbajtjet janë hequr menjëherë dhe se ka nisur një hetim urgjent, duke paralajmëruar masa shtesë për të parandaluar futjen e sendeve të paligjshme në burgje.
