Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
BOTA
Italia do të refuzojë ftesën për Bordin e Paqes së Trump-it
PiranjatPërditësimi i fundit 21 Janar 2026, 09:08
Italia pritet të refuzojë hyrjen në Bordin e Paqes, nismën e promovuar nga presidenti amerikan, Donald Trump, me argumentin se bie ndesh me Kushtetutën. Pengesa kryesore është neni 11 i Kushtetutës italiane, i cili lejon pjesëmarrjen e vendit në organizma ndërkombëtarë që merren me paqen vetëm “në kushte barazie me shtetet e tjera”. Një parim që, sipas Romës zyrtare, nuk respektohet nga struktura e re e ideuar nga Trump, ku SHBA-të do të kishin rolin dominues në një lloj “OKB-je private”, me një tarifë hyrjeje prej 1 miliard dollarësh.
Ky është dyshimi kryesor që po e shtyn kryeministren Giorgia Meloni të mos e firmosë anëtarësimin e Italisë në këtë këshill, i cili pritet të prezantohet zyrtarisht në Davos. Edhe pse Meloni mund të jetë e pranishme në Davos për arsye marrëdhëniesh me Shtëpinë e Bardhë, ajo është gjithnjë e më e bindur se nuk mund të angazhojë Italinë në këtë nismë, përtej kostos financiare.
Një tjetër element problematik është procedura institucionale. Ratifikimi i traktateve ndërkombëtare kërkon miratimin e Parlamentit me ligj të zakonshëm, por koha nuk mjafton. Për më tepër, Presidenca e Republikës do ta bllokonte menjëherë një akt të tillë, pikërisht duke iu referuar nenit 11, ndërsa rreziku i rrëzimit në Gjykatën Kushtetuese do të ishte i lartë.
“Nuk është një rrugë e përshkueshme”, është bindja që po konsolidohet në Palazzo Chigi, edhe nën shtysën e Forza Italia-s.
Partia e Antonio Tajani-t shprehet hapur kundër hyrjes së Italisë në bordin e Trumpit, duke e konsideruar atë një goditje për të drejtën ndërkombëtare. Edhe Liga është rreshtuar me “qëndrimin e qeverisë”, ndonëse disa figura brenda saj shfaqin simpati për idenë e Trump-it. Rezerva ka shprehur edhe ministri i Mbrojtjes Guido Crosetto, sidomos për faktin se në listën e ftesave për këtë organizëm përfshihet edhe Vladimir Putin dhe se nisma nuk do të kufizohej vetëm te stabiliteti në Gaza.
Një “Jo” nga Meloni ndaj Trump-it do të kishte peshën e një përçarjeje politike, veçanërisht pas kritikave që kryeministrja italiane i ka bërë presidentit amerikan për paralajmërimin e tarifave ndaj vendeve europiane që mbështesin Groenlandën. Nga deklaratat, çështja do të kalonte në veprime konkrete.
Gjatë gjithë ditës, Meloni ka zhvilluar kontakte intensive me liderë europianë për të ndërtuar qëndrimin italian. Sipas Financial Times, edhe kryeministri britanik Keir Starmer pritet të refuzojë ftesën e Trump-it për t’iu bashkuar Bordit të Paqes, ndërsa edhe Gjermania e Friedrich Merz e konsideron “të pamundur” anëtarësimin, të paktën në formën aktuale. Në këtë situatë, mes vendeve europiane që mbeten të hapura ndaj nismës përmenden vetëm Hungaria dhe Shqipëria, shkruan Corriere della Sera.
Palazzo Chigi nuk ka dhënë sqarime deri vonë në mbrëmje, çka tregon një proces të ndërlikuar politik dhe diplomatik. Mbetet e hapur mundësia që Meloni të shkojë në Davos vetëm si “vëzhguese”, pa firmosur asnjë marrëveshje, ose të mos marrë pjesë fare.
Ndërkohë, axhenda e saj përfshin edhe një Këshill Europian të jashtëzakonshëm në Bruksel, të thirrur pas tensioneve të lidhura me Groenlandën dhe kërcënimeve amerikane për tarifa të reja. Meloni dhe Tajani mbeten të rezervuar ndaj idesë së një kundërpërgjigjeje të fortë tregtare të BE-së dhe theksojnë se për Groenlandën nevojitet një reagim i përbashkët i NATO-s ndaj ndërhyrjeve ruse dhe kineze.
