NATO paralajmëron për Putinin: Gjithnjë e më i paparashikueshëm dhe i gatshëm të marrë rreziqe

Një zyrtar i lartë ushtarak i NATO-s ka paralajmëruar për një sjellje gjithnjë e më të paparashikueshme të Vladimir Putinit, ndërsa lufta në Ukrainë vijon dhe aleanca përballet me shqetësime për veprime të mundshme ruse përtej fushëbetejës. Gjenerali britanik i Forcave Ajrore Sir John Stryger, zëvendëskomandant suprem i NATO-s në Evropë, tha në një konferencë sigurie në Estoni se aleatët duhet të tregohen veçanërisht të kujdesshëm përballë një situate të tensionuar. Sipas tij, Rusia mund të përpiqet ta provokojë NATO-n në mënyrë që aleanca të reagojë në mënyrë të tepruar.

Paralajmërimi vjen në një kohë kur disa vende evropiane kanë ngritur shqetësime për mundësinë e veprimeve ruse që variojnë nga sabotazhi dhe spiunazhi deri te incidentet me dronë apo raketa. Kryeministri polak Donald Tusk ka paralajmëruar se Rusia mund të tentojë sulme ndaj territorit të vendeve të NATO-s dhe më pas t’i paraqesë ato si incidente aksidentale. Megjithatë, vlerësimet brenda aleancës nuk janë të njëjta. Zyrtarë të tjerë evropianë kanë theksuar se, ndonëse kërcënimi nga Rusia mbetet serioz, nuk ka prova se Moska po përgatit aktualisht një sulm të drejtpërdrejtë ushtarak ndaj NATO-s.

Edgars Rinkēvičs, presidenti i Letonisë, ka deklaruar gjithashtu se nuk po vërehet grumbullim i forcave ruse pranë kufijve të shteteve baltike. Ndërkohë, ambasadori amerikan në NATO, Matthew Whitaker, ka hedhur poshtë idenë se Rusia po përpiqet të testojë drejtpërdrejt aleancën, duke argumentuar se Putini nuk kërkon një konflikt me NATO-n. Presidenti ukrainas Volodymyr Zelensky ka ngritur një tjetër skenar, duke paralajmëruar se Moska mund të tentojë një sulm ndaj një vendi tjetër evropian me dronë, raketa apo edhe përmes një operacioni tokësor.

Sipas Zelenskyt, një veprim i tillë do të kishte si qëllim krijimin e përçarjeve mes vendeve evropiane dhe Shteteve të Bashkuara dhe dobësimin e mbështetjes perëndimore për Ukrainën. Paralajmërimet vijnë ndërsa incidentet me dronë dhe kërcënimet hibride në krahun lindor të NATO-s kanë shtuar shqetësimet në disa vende. Rumania, për shembull, ka raportuar rritje të ndjeshme të inkursioneve të dronëve pranë kufirit me Ukrainën, ndërsa vendet e NATO-s kanë diskutuar masa shtesë për mbrojtjen kundër këtyre kërcënimeve.

Zelensky ka argumentuar se presidenti rus është nën presion për shkak të mungesës së rezultateve vendimtare në fushëbetejë dhe se Kremlini mund të kërkojë mënyra të tjera për të ushtruar presion mbi Perëndimin. Ndërkohë, lufta ajrore mes Rusisë dhe Ukrainës është intensifikuar. Vetëm ditët e fundit, Ukraina ka kryer sulme masive me dronë ndaj objektivave në territorin rus, ndërsa Rusia ka vijuar sulmet me raketa dhe dronë ndaj qyteteve dhe infrastrukturës ukrainase. Përplasja e deklaratave vjen në një moment kur vendet e NATO-s po diskutojnë mënyrën e reagimit ndaj kërcënimeve hibride, ndërsa njëkohësisht theksojnë se një konflikt i drejtpërdrejtë mes Rusisë dhe aleancës nuk është i pashmangshëm.