Gjermania miraton përgjysmimin e kuotës vjetore të punësimit për Ballkanin Perëndimor

Qeveria gjermane ka miratuar një projekt-rregullore që parashikon përgjysmimin e numrit të miratimeve vjetore për punësimin e shtetasve nga Ballkani Perëndimor. Sipas ndryshimeve të propozuara, kuota do të ulet nga 50 mijë në 25 mijë miratime fillestare në vit, duke nisur nga 1 janari 2027.

Vendimi u mor nga kabineti federal më 4 nëntor, por për t’u bërë përfundimtar duhet të marrë edhe miratimin e Bundesrat-it, dhomës që përfaqëson landet gjermane.

Kufizimi prek qytetarët e Shqipërisë, Kosovës, Bosnjë-Hercegovinës, Serbisë, Malit të Zi dhe Maqedonisë së Veriut, të cilët përfitojnë nga Rregullorja e Ballkanit Perëndimor, e miratuar në vitin 2016 për të lehtësuar punësimin e tyre në Gjermani.

Kjo skemë u mundëson shtetasve të këtyre vendeve të aplikojnë për vizë pune edhe në profesione që nuk kërkojnë domosdoshmërisht një diplomë universitare apo kualifikim profesional të njohur në Gjermani.

Nisma ka hasur kundërshtime nga Agjencia Federale e Punësimit, e cila ka kërkuar ruajtjen e kuotës aktuale. Sipas saj, vetëm në shtator të vitit 2026, rreth 546 mijë shtetas nga vendet e Ballkanit Perëndimor ishin të punësuar në Gjermani në sektorë që i nënshtrohen sigurimeve shoqërore.

Agjencia paralajmëron se ulja e kuotës mund të vështirësojë plotësimin e vendeve vakante, veçanërisht në ndërtim, transport, logjistikë, gastronomi dhe kujdes shëndetësor, ku kërkesa për punonjës mbetet e lartë.

Nga ana tjetër, qeveria gjermane argumenton se kufizimi synon t’u japë përparësi personave që janë tashmë të disponueshëm në tregun vendas të punës. Megjithatë, ndryshimi nuk do të thotë mbyllje e mundësive për punësim të qytetarëve të Ballkanit Perëndimor, të cilët do të mund të aplikojnë edhe përmes skemave të tjera ligjore, veçanërisht atyre që lidhen me punonjësit e kualifikuar. /skyweb.al