Sali Berisha deklaron se Belinda Balluku duhet të ishte prapa hekurave dhe jo të ecte e lirë. Në një komunikim me gazetarët, kre...
BOTA
Stuhitë e fuqishme godasin Meksikën, përmbytjet rrëmbejnë makina dhe "pushtojnë" shtëpi e spitale
PiranjatPërditësimi i fundit 26 Tetor 2026, 18:44
Stuhitë e fuqishme dhe reshjet intensive të shiut kanë shkaktuar përmbytje masive në shtetin Chihuahua të Meksikës, duke rrëmbyer automjete, përmbytur banesa dhe dëmtuar infrastrukturën. Situata më e rëndë është regjistruar në qytetin Ciudad Juárez, ku ekipet e emergjencës janë angazhuar në operacione të shumta shpëtimi gjatë fundjavës.
Pamjet e publikuara në rrjetet sociale tregojnë rrugë të shndërruara në lumenj, automjete që merren përpara nga rrjedha e fuqishme e ujit dhe lagje të tëra të mbuluara nga përmbytjet.
Sipas Qendrës së Koordinimit të Mbrojtjes Civile të shtetit Chihuahua (CEPC), janë regjistruar mbi 100 incidente të lidhura me motin e keq në qytetet Ciudad Juárez, Parral dhe Delicias.
Një nga momentet më dramatike është regjistruar pranë lumit Las Víboras, ku ujërat e rrëmbyeshme morën përpara automjete dhe përmbytën banesat në lagjen Frontera Baja.
???????? A major flood hit Ciudad Juárez, Mexico, inundating entire neighborhoods and sweeping away dozens of cars https://t.co/MC2nofQ0Mo
Sipas mediave lokale, një familje me nëntë anëtarë, mes tyre pesë fëmijë, përjetoi momente tmerri kur automjeti me të cilin udhëtonin u rrëmbye nga ujërat dhe përfundoi jashtë rrugës, pranë një shkëmbi. Fatmirësisht, të gjithë anëtarët e familjes arritën të shpëtonin falë ndërhyrjes së një burri që ndodhej në vendngjarje.
Autoritetet meksikane kanë mobilizuar ekipet e shpëtimit në zonat më të prekura, ndërsa zjarrfikësit kanë marrë dhjetëra telefonata nga qytetarë të bllokuar brenda automjeteve dhe banesave të përmbytura.
Një nga situatat më shqetësuese është regjistruar në Spitalin e Përgjithshëm të Zonës Nr. 6, që administrohet nga Instituti Meksikan i Sigurimeve Shoqërore. Ujërat e përmbytjeve depërtuan brenda ndërtesës, duke përfshirë dhomat e pacientëve, një sallë operacioni dhe njësinë e sterilizimit.
Sipas institucionit, reshjet intensive bllokuan sistemin e kullimit të spitalit, duke shkaktuar daljen e ujit dhe përmbytjen e disa ambienteve të rëndësishme për funksionimin e tij.
Në momentin e përmbytjes, brenda spitalit ndodheshin të paktën 176 pacientë. Autoritetet shëndetësore konfirmuan se të gjithë janë në gjendje të mirë shëndetësore dhe nuk është raportuar për persona të lënduar.
Kreu i Mbrojtjes Civile lokale, Sergio Rodríguez, deklaroi se, pavarësisht përmasave të mëdha të përmbytjeve, deri të shtunën nuk kishte raportime për të lënduar.
Ndërkohë, autoritetet vijojnë ndërhyrjet për largimin e ujit nga zonat e përmbytura, pastrimin e rrugëve dhe vlerësimin e dëmeve të shkaktuara nga stuhitë që goditën veriun e Meksikës gjatë fundjavës./PiranjatNews/
