Të dhënat e 8.8 milionë personave ekspozohen në Danimarkë nga një incident sigurie

Të dhënat personale të rreth 8.8 milionë njerëzve në Danimarkë janë bërë të aksesueshme nga persona të paautorizuar përmes një incidenti sigurie që përfshiu Regjistrin Qendror të Personave (CPR) të vendit.
Sipas transmetuesit danez DR, incidenti është cilësuar nga Ministria e Kërkimit, Arsimit dhe Dixhitalizimit si “thellësisht serioz”, ndërsa autoritetet kanë nisur punën për të përcaktuar përmasat e plota të ngjarjes.
Sipas ministrisë, aksesi i paautorizuar u mundësua përmes keqpërdorimit të së drejtës legjitime të një kompanie daneze për të kryer kërkime në sistemin CPR.
Autoritetet kanë pezulluar menjëherë aksesin e kompanisë në regjistër dhe kanë njoftuar Agjencinë Daneze për Mbrojtjen e të Dhënave.
Të dhënat e ekspozuara përfshijnë emra, adresa dhe numra personalë identifikimi. Sipas ministrisë, incidenti nuk ka prekur emrat dhe adresat e personave që kanë kërkuar mbrojtje të këtyre të dhënave.
Ministrja e Kërkimit, Arsimit dhe Dixhitalizimit, Christina Egelund, u ka bërë thirrje qytetarëve të tregohen të kujdesshëm dhe të mos ndajnë fjalëkalime apo informacione të tjera konfidenciale në përgjigje të telefonatave, emaileve ose kontakteve të tjera të dyshimta.
Autoritetet paralajmërojnë se qytetarët duhet të jenë veçanërisht të kujdesshëm edhe në rastet kur personi që i kontakton disponon të dhëna të sakta si emri, adresa apo numri i tyre personal të CPR-së.
Regjistri Qendror i Personave në Danimarkë përmban të dhëna për rreth 11 milionë persona, përfshirë edhe persona të vdekur dhe shtetas danezë që janë larguar nga vendi.
Lexo edhe
BOTA
Kreu i BND-së: Gjermania rrezikon të përfshihet në një konflikt të armatosur me Rusinë

Zbulim i ri për Alzheimerin: Molekula eksperimentale rikthen kujtesën në testet te kafshët

Gratë iraniane trajnohen me armë në Teheran, rritet gatishmëria civile mes tensioneve me SHBA-në dhe Izraelin

Protestat e studentëve në Francë, pezullohet mësimi në 500 shkolla

SHBA tërheq bombarduesit nga baza ushtarake në Britani




