Nga Florjan Binaj
Ky vit do të mbahet mend si viti i rënies së autokracive të Europës Lindore e Juglindore. Fillimisht Orbani, nje...
SPORT
Chivu kërkon hakmarrje në derbi: “Duhet të ndryshojmë historinë!”
PiranjatPërditësimi i fundit 31 October 2026, 09:30
Trajneri i Interit, Cristian Chivu, ka folur në prag të derbit me Milanin, duke pranuar se seria prej shtatë ndeshjesh pa fitore ndaj rivalëve kuqezi është një statistikë që kërkon reflektim.
“Nëse nuk e kemi fituar derbin në shtatë ndeshje, duhet t’i bëjmë vetes disa pyetje. Kjo nuk do të thotë se djemtë nuk kanë punuar shumë, por në disa raste rrethanat nuk kanë qenë në favorin tonë”, u shpreh rumuni.
Për të dalë me sukses nga kjo përballje, Chivu kërkon më shumë përqendrim dhe sakrificë nga futbollistët, duke theksuar se cilësitë individuale nuk mjaftojnë.
“Duhet të kemi ekuilibër dhe motivim, të bëjmë disa sakrifica më shumë sesa në ndeshjet e tjera. Duhet të jemi të organizuar edhe kur nuk e kemi topin, të tregojmë uri dhe disiplinë”, deklaroi trajneri.
Sa i përket garës për titull, tekniku zikaltër vlerësoi se derbi ka peshë të madhe, por nuk është vendimtar për ecurinë e kampionatit. “Jemi vetëm në javën e dhjetë. Një derbi mund t’i japë shumë njërës skuadër dhe t’i marrë tjetrës, por rruga është ende e gjatë. Nuk ka favoritë”, theksoi ai.
Chivu foli edhe për Marcus Thuram, duke vlerësuar formën e sulmuesit francez dhe besimin që ka fituar nga paraqitjet e fundit. Ndërkohë, për zgjedhjet në formacion pranoi se dëmtimet ia kanë vështirësuar rotacionin, ndërsa për aktivizimin e Martinezit nuk dha një përgjigje përfundimtare.
“Përpiqem gjithmonë të gjej rotacionet e duhura, sepse nuk kam shumë alternativa. Për Martinezin do të shohim nesër”, u shpreh ai.
Në fund, trajneri komentoi edhe projektin e stadiumit të ri, duke pranuar lidhjen emocionale me “San Siron”, por duke mbështetur investimet dhe zhvillimin e futbollit.
“E kuptoj tifozët që kanë një lidhje të veçantë me Meazzën, sepse edhe unë kam luajtur aty. Por jam gjithashtu pro inovacionit. Bota ecën përpara dhe pa para futbolli nuk mund të mbijetojë”, deklaroi Chivu.
I pyetur nëse do të jetë ende në stolin e Interit kur skuadra të luajë në stadiumin e ri, në sezonin 2031/32, ai u përgjigj me humor: “Nëse ndryshon kultura sportive dhe vijnë rezultatet, do të kem më pak flokë të thinjur dhe nuk do të përfundoj në spital si disa nga kolegët e mi”.
