Gazetari Almer Toska ka publikuar një video-mesazh drejtuar Kryeministrit Edi Rama, në të cilin gazetari përdor tone të forta dhe dek...
EDITORIAL
Hëna është afër, ëndrra shumë larg
PiranjatPërditësimi i fundit 19 Prill 2026, 21:22
Nga Mimoza Hafizi
Mirëmbrëma, Unë jam Mimoza Hafizi, dhe profesioni im janë yjet, janë planetet, është Gjithësia. Të ngre sytë lart ka qenë përherë pasioni im, jo vetëm për të parë yjet, eklipset apo kometat, por edhe për të ëndërruar.
Sot, njerëzimi po bëhet gati të rikthehet në Hënë. Misioni “Artemis” nuk është thjesht një udhëtim teknologjik; është prova se njeriu nuk pranon kufij. Atje lart po projektohet e ardhmja jonë si specie.
Do të ndërtohen stacione, do të kërkohet ujë, do të studiohen burime të reja. Universi po hapet para nesh.
Si profesore e astrofizikës, detyra ime ka qenë t’u flas studentëve për objektet qiellore e për ngjarjet me energji kolosale, t'u tregoj përpjekjen tonë të pandalshme për t'i njohur e kuptuar. Si mike e qiellit kam organizuar parreshtur seanca vrojtimi me publikun dhe rininë. Çdo herë kam njohur studentë a gjimnazistë, të zgjuar, kureshtarë, ëndërrimtarë për t'i arritur yjet. Por shpesh realiteti u mëson se të studiosh shkencë në Shqipëri është një pasion që jo përherë të çon larg.
Se në vendin tonë zyrat janë më të shtrenjta se laboratorët, TikTok-u duket më fitimprurës se shkolla e dija, dhe se pasuria kombëtare janë kullat e autostradat, por jo mendja, jo kërkimi e inovacioni.
Ne japim thërrime për shkencën, por me thërrime nuk ndërtohet as vizion e as e ardhme.
Ne jemi i vetmi vend në Europë që nuk ka një observator vrojtimi të qiellit. E pra, Kosova ka dy të tillë.
Duke mos e konsideruar dijen të denjë për vëmendje, ne nuk humbasim vetëm mundësinë e pjesëmarrjes në shkencën botërore. Ne humbasim të drejtën e një brezi për të ëndërruar. Ne ia presim krahët para se të duan të nisen për fluturim.
Unë kam bindjen se mungesa e mbështetjes për shkencën nuk është thjesht varfëri. Është zgjedhje. Sepse një shoqëri e paditur kontrollohet më lehtë.
Misioni “Artemis” do të vazhdojë. Njeriu do të shkojë edhe në Mars. Por shumë mendje të ndritura që kemi këtu, rrotull nesh, rrezikojnë të mos jenë asnjëherë pjesë e kësaj aventure.
Universi duket i pafund. Por koha jonë nuk është e tillë.
Para se të iki, dua t’ju bëj tri pyetje.
A ju ka nxitur kureshtja të dini më shumë për pikat e ndritshme në qiell?
Si quhen? Sa larg ndodhen?
E pra, i kemi përnatë mbi kokën tonë./Piranjat News
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
