Eisenkot merr mandatin për formimin e qeverisë së re në Izrael/ A po i vjen fundi Netanyahut

Presidenti izraelit, Isaac Herzog, ka vendosur t’ia besojë mandatin për formimin e qeverisë udhëheqësit të opozitës, Gadi Eisenkot. Zyra e Presidentit njoftoi vendimin të shtunën në mbrëmje, më 7 nëntor 2026.

Presidenti e ftoi liderin e partisë së qendrës, Yashar, në rezidencën e tij në Jerusalem të dielën pasdite.

Vendimit i paraprinë konsultimet me të gjitha grupet parlamentare në Knessetin e ri. Grupet parlamentare, të cilat disponojnë gjithsej 67 nga 120 vendet në parlament, rekomanduan që Herzog t’ia besojë mandatin për formimin e qeverisë Eisenkotit.

Formimi i qeverisë pritet të jetë i ndërlikuar

Formimi i një qeverie pritet të jetë shumë i vështirë, pasi në zgjedhjet parlamentare të 27 tetorit as koalicioni qeverisës i kryeministrit Benjamin Netanjahu dhe as blloku opozitar i drejtuar nga Eisenkot nuk arritën të sigurojnë shumicën e nevojshme prej 61 deputetësh.

Blloku kundër Netanjahut, i udhëhequr nga ish-shefi i Shtabit të Përgjithshëm, Gadi Eisenkot, në përgjithësi ka refuzuar bashkëpunimin me partitë arabe, të cilat mund t’i siguronin shumicën. Megjithatë, politikanët arabë kanë deklaruar mbështetjen e tyre për Eisenkotin gjatë konsultimeve.

Mundësi të reja për krijimin e një koalicioni janë hapur edhe përmes afrimit të aleancës opozitare me partitë ultraortodokse, të cilat deri më tani kanë qenë aleate të Netanjahut. Së bashku, ato do të siguronin 61 deputetët e nevojshëm për formimin e qeverisë.

Pika kryesore e mosmarrëveshjes mbetet shërbimi i detyrueshëm ushtarak për studentët ultraortodoksë të shkollave fetare.

Eisenkot tani ka 28 ditë për të formuar një koalicion qeveritar, me mundësinë e zgjatjes së këtij afati edhe me 14 ditë të tjera. Nëse ai dështon, Presidenti do t’ia besojë mandatin një deputeti tjetër, i cili gjithashtu do të ketë 28 ditë për të tentuar formimin e qeverisë.

Netanyahu bën thirrje për një “qeveri të unitetit kombëtar”

Kryeministri aktual izraelit, Benjamin Netanjahu, u bëri më herët thirrje partive opozitare që të formojnë një “qeveri të unitetit kombëtar”.

Netanyahu nuk specifikoi se kush duhet ta udhëheqë një qeveri të tillë. Në të njëjtën kohë, ai paralajmëroi opozitën të mos krijojë një qeveri që do të varej nga mbështetja e dy partive arabe. Sipas tij, një qeveri e tillë do ta dëmtonte Izraelin nga brenda.

Eisenkot e cilësoi fjalimin e Netanjahut në platformën X si “një truk të lirë propagandistik”. Sipas tij, një njeri që ka përçarë shoqërinë izraelite dhe ka mbjellë ndasi flet për unitet vetëm kur e kupton se ditët e tij në pushtet janë të numëruara.

Ai shtoi se Netanjahu nuk ka respektuar kurrë asnjë nga marrëveshjet që ka nënshkruar me partnerët politikë.

“Nëse Likudi dhe aleatët e tij janë vërtet të interesuar për unitetin dhe një qeveri të gjerë, atëherë duhet të shkëpusin publikisht aleancën me ekstremistët dhe të njoftojnë se janë të gatshëm t’i bashkohen një qeverie të udhëhequr nga Eisenkot”, deklaroi kreu i opozitës./DW