Kremlini zbulon temat e bisedimeve me Kievin në Abu Dhabi, Peskov: Garancitë e sigurisë për Rusinë dhe Ukrainën do të jenë reciproke

Bisedimet e ardhshme trepalëshe në Abu Dhabi mes Rusisë, Ukrainës dhe Shteteve të Bashkuara do të përqendrohen te çështjet e sigurisë dhe garancitë e ndërsjella për të dyja vendet. Deklarata është bërë nga zëdhënësi i Kremlinit, Dmitry Peskov, në një intervistë për televizionin rus “Vesti”.

Peskov theksoi se garancitë e sigurisë nuk mund të jenë të njëanshme, duke nënvizuar se siguria e një shteti nuk duhet të garantohet në dëm të një tjetri. Sipas tij, parimi i sigurisë së pandashme mbetet një nga elementet kryesore të qëndrimit të Moskës për zgjidhjen e konfliktit në Ukrainë.

Ai bëri të ditur se detajet e këtyre diskutimeve do të trajtohen me dyer të mbyllura, ndërsa përjashtoi mundësinë e përfshirjes së vendeve evropiane në këtë raund negociatash, pasi palët kanë rënë dakord për një format trepalësh, me Rusinë dhe Ukrainën në tryezë dhe SHBA-në si ndërmjetëse.

Sa i përket përfaqësimit rus, Peskov konfirmoi se delegacioni do të përbëhet nga zyrtarë të institucioneve të ndryshme shtetërore, përfshirë Ministrinë e Jashtme, ndërsa do të drejtohet nga Vladimir Medinsky.

Zëdhënësi i Kremlinit u shpreh gjithashtu se Rusia, herët a vonë, do të duhet të negociojë me vendet evropiane për një sistem të ardhshëm sigurie në kontinent. Megjithatë, sipas tij, fillimisht duhet të përcaktohet se kush do të jetë përfaqësuesi i Evropës në këto bisedime.

Ndërkohë, ende nuk është bërë e ditur se kush do të përfaqësojë Rusinë në një takim mes delegacioneve ruse dhe ukrainase, të cilin Zonja e Parë e SHBA-së, Melania Trump, planifikon të thërrasë.