Tinder si karrem për grabitje, zbulohet skema e pazakontë e grupit kriminal në Turqi

Një skemë e pazakontë mashtrimi dhe vjedhjeje, e organizuar përmes aplikacionit të njohjeve Tinder, është zbuluar nga autoritetet në Turqi. Tetë persona janë arrestuar, pasi dyshohet se shfrytëzonin takimet me persona të njohur në aplikacion për t’u vjedhur telefonat dhe më pas për t’u zbrazur llogaritë bankare.

Sipas Prokurorisë së Përgjithshme të Ankarasë, operacionet u zhvilluan njëkohësisht në tri provinca: Ankara, Kastamonu dhe Sirnak. Mes të ndaluarve është edhe personi që dyshohet se drejtonte grupin kriminal, si dhe shtatë anëtarë të tjerë.

Mënyra e veprimit ishte e mirëorganizuar. Të dyshuarit krijonin kontakte me viktimat përmes Tinder, duke u paraqitur si persona të interesuar për miqësi. Pas krijimit të besimit, caktonin takime dhe shfrytëzonin momentet e shpërqendrimit për të mësuar kodet e zhbllokimit të telefonave.

Pasi siguronin pajisjet, ata hynin në llogaritë bankare të viktimave dhe transferonin shuma parash në llogari të personave të tretë. Më pas, paratë tërhiqeshin dhe depozitoheshin në llogaritë personale të anëtarëve të grupit, të cilët i ndanin mes tyre.

Sipas hetimeve, aktiviteti kriminal ishte shtrirë në pesë provinca të Turqisë. Gjatë kontrolleve në banesat e të dyshuarve, policia sekuestroi një sasi të konsiderueshme materialesh dhe pajisjesh digjitale.

Autoritetet nuk kanë bërë ende të ditur shumën totale të parave të përvetësuara apo numrin e personave të dëmtuar. Ndërkohë, hetimet vijojnë për të zbardhur plotësisht aktivitetin e grupit dhe për të identifikuar të gjitha viktimat.