Zonat malore në qarkun e Kukësit po përjetojnë kushte klimaterike dimërore, ndonëse jemi ende në fund të muajit tetor.
...
SPORT
“Lëre Twitter-in dhe bëj punën tënde”, yjet e Atletico-s shpërthejnë kundër ministrit spanjoll
PiranjatPërditësimi i fundit 28 October 2026, 19:21
Tragjedia hekurudhore në Spanjë ka hapur edhe një debat mbi përgjegjësinë e institucioneve për sigurinë e transportit publik. Në qendër të kritikave është vendosur ministri i Transporteve, Óscar Puente, të cilin futbollisti i Atletico Madridit, Marcos Llorente, e ka sulmuar drejtpërdrejt për aktivitetin e tij në rrjetet sociale dhe mënyrën se si ushtron përgjegjësitë publike.
Llorente nuk është mjaftuar me një mesazh ngushëllimi për viktimat, por ka kërkuar llogari nga ministri, duke e akuzuar se i kushton më shumë vëmendje debateve në Twitter sesa problemeve të transportit.
“I dashur Óscar Puente, a nuk mendon se ka ardhur momenti të lësh mënjanë Twitter-in dhe të përqendrohesh te puna për të cilën të paguajmë?”, shkruan futbollisti i Atleticos në një postim në Instagram.
Më tej, Llorente e lidh drejtpërdrejt përgjegjësinë politike me sigurinë e qytetarëve që përdorin çdo ditë infrastrukturën publike.
“Kur bëhet fjalë për jetë njerëzish, minimumi që mund të kërkohet nga një ministër Transportesh është përgjegjësi, seriozitet, siguri dhe respekt”, vijon ai.
Por kritikat e futbollistit nuk ndalen këtu. Llorente sulmon edhe mënyrën se si përfaqësuesit e institucioneve përfshihen në përplasje publike në rrjetet sociale, ndërkohë që qytetarët kërkojnë përgjigje për sigurinë e shërbimeve.
“Na ka ardhur në majë të hundës nga politikanët që duken më të shqetësuar për të fituar debate në rrjetet sociale, sikur të ishin 13-vjeçarë, sesa për t'iu përgjigjur siç duhet përgjegjësive që kanë”, shkruan futbollisti.
Në fund, Llorente i drejtohet sërish ministrit Puente me një mesazh edhe më të ashpër.
“Twitter-i nuk është puna jote. Puna jote është transporti publik, siguria dhe dhënia e llogarisë kur gjërat shkojnë keq. Deri tani, në këtë drejtim, je një katastrofë”, përfundon ai.
Mesazhi ka marrë mbështetjen e dy futbollistëve të Real Madridit, Dani Carvajal dhe Thibaut Courtois, të cilët e kanë ripostuar reagimin e Llorentes. Kështu, kritikat ndaj ministrit kanë kaluar përtej rivalitetit sportiv mes Atleticos dhe Realit.
Ndërkohë, Real Madridi ka reaguar edhe zyrtarisht për aksidentin hekurudhor, duke shprehur ngushëllimet për familjet e viktimave dhe solidaritetin me të plagosurit.
“Real Madrid CF dëshiron të shprehë tronditjen e tij më të thellë për aksidentin tragjik hekurudhor që ndodhi në provincën e Toledos”, thuhet në deklaratën e klubit madrilen.
Klubi ka shprehur gjithashtu mbështetje për ekipet e emergjencës që ndërhynë pas aksidentit dhe për qytetarët që kanë humbur familjarët e tyre.
Ndërsa Real Madridi ka zgjedhur reagimin institucional, Llorente, Carvajal dhe Courtois kanë vënë në qendër të debatit përgjegjësinë e ministrit të Transporteve. Mesazhi i tyre kërkon që Óscar Puente të japë përgjigje për sigurinë e transportit hekurudhor, në vend që të përfshihet në debate politike në rrjetet sociale.
