Autoritetet ukrainase kundër korrupsionit, NABU dhe SAPO, kanë nisur një aksion ndaj zyrtarëve të Prokurorisë së Përgj...
LIFESTYLE
Misteri i Bermudës zgjidhet pas dekadash: çfarë fshihet nën ishullin legjendar
PiranjatPërditësimi i fundit 16 Maj 2026, 08:57
Një prej mistereve më të vjetra gjeologjike të Oqeanit Atlantik mund të jetë më në fund i zgjidhur. Shkencëtarët thonë se kanë zbuluar pse Bermuda një grup i vogël ishujsh në mes të Atlantikut Verior vijon të qëndrojë në sipërfaqe, edhe pse vullkanet e tij janë shuar prej më shumë se 30 milionë vitesh.
Një ekip studiuesish nga Instituti Carnegie për Shkencë dhe Universiteti i Yale-it zbuloi se nën Bermudë fshihet një strukturë masive shkëmbore, e formuar pas shpërthimeve të fundit vullkanike, që ka mbajtur ishullin “pezull” mbi ujë që nga kohët parahistorike.
Për dekada, shkencëtarët ishin përballur me një paradoks: zakonisht, ishujt vullkanikë në oqean kanë nevojë për aktivitet të vazhdueshëm të nxehtësisë nga thellësia e Tokës për të mos u fundosur gradualisht. Por Bermuda mbeti një përjashtim i pashpjeguar.
Tani, studiuesit kanë identifikuar një strukturë gjigante shkëmbore, rreth 19 kilometra të trashë – afërsisht sa gjatësia e ishullit Manhattan në New York City që ndodhet poshtë shtresës normale oqeanike.
Ky shkëmb është më i lehtë se materiali përreth dhe funksionon si një platformë notuese gjigante, duke e mbajtur të ngritur të gjithë zonën.
Sipas studiuesve, kjo shtresë u krijua 30 deri në 35 milionë vite më parë, kur magma e nxehtë nga thellësitë e Tokës u ngjit drejt sipërfaqes, u përhap poshtë kores oqeanike dhe më pas u ftoh e u ngurtësua.
Për të arritur në këtë përfundim, shkencëtarët nuk kryen shpime të reja.
Ata analizuan më shumë se 20 vite të dhënash sizmike nga dridhjet natyrore të tërmeteve, të regjistruara nga një stacion i vetëm monitorimi në ishull. Duke gjurmuar mënyrën sesi valët sizmike ndryshonin shpejtësi në shtresa të ndryshme shkëmbore, ekipi arriti të krijonte një “hartë” të strukturës deri në mbi 40 kilometra nën sipërfaqe.
Por zbulimi mund të ketë pasoja edhe për një tjetër mister të famshëm: të ashtuquajturin “Trekëndëshi i Bermudës”.
Studiuesit theksojnë se zona ka anomali natyrore gravitacionale dhe magnetike.
Në disa pjesë, graviteti është pak më i dobët se zakonisht për shkak të shkëmbinjve më të lehtë nëntokësorë, ndërsa shkëmbinjtë e pasur me hekur dhe titan mund të shkaktojnë sinjale magnetike më të forta që ndikojnë në busulla dhe pajisje navigimi megjithëse ekspertët theksojnë se këto janë dukuri krejtësisht natyrore dhe të padëmshme.
“Bermuda është një vend emocionues për t’u studiuar, sepse shumë nga tiparet e saj nuk përputhen me modelet klasike gjeologjike”, tha studiuesi William Frazer. “Kjo sugjeron se në mantelin e Tokës ekzistojnë procese që ende nuk i kuptojmë plotësisht”.
