Lodhen shumë! Hapet hoteli i daljes në pension për Gen Z

Një koncept i pazakontë po tërheq vëmendjen në Malajzi, ku të rinjtë e lodhur nga puna, presioni ekonomik dhe ritmi i jetës moderne kanë mundësinë të jetojnë përkohësisht si pensionistë, edhe pse janë vetëm 20 apo 30 vjeç.

Në rajonin Perak, në qytetin Gopeng, është prezantuar një qendër e quajtur “Shtëpia e Pensionit për të Rinjtë”, e krijuar posaçërisht për pjesëtarët e Gjeneratës Z dhe të rinjtë e tjerë që përjetojnë stres dhe rraskapitje nga angazhimet e përditshme.

Ideja është e thjeshtë: të rinjtë paguajnë për të qëndruar për një muaj në një ambient të qetë, të rrethuar nga natyra, ku nuk kanë detyrime pune, objektiva për të përmbushur apo orare të ngurta.

Qendra Gopeng Sanctuary u bë e njohur në dhjetor 2025, ndërsa iniciativa të ngjashme kanë tërhequr interes edhe gjatë vitit 2026.

Për një pagesë prej 2 mijë ringgitësh malajziane, afërsisht 430 euro në muaj, oferta fillestare përfshinte akomodimin, tri vakte ushqimore në ditë dhe mundësinë për të kaluar kohën sipas dëshirës.

Banorët mund të flenë deri vonë, të shëtisin në natyrë, të kujdesen për kafshët, të merren me kopshtari ose thjesht të qëndrojnë pa bërë asgjë.

Ndryshe nga një vend pune, këtu nuk ka objektiva produktiviteti, mbledhje, afate dorëzimi apo presion për rezultate.

Pas projektit qëndron një 25-vjeçar malajzian, familja e të cilit administron një shtëpi tradicionale për të moshuarit.

Ai vendosi të krijojë një ambient të ngjashëm, por të përshtatur për të rinjtë që ndihen të rraskapitur shumë përpara se të arrijnë moshën e pensionit.

Interesi ishte i menjëhershëm. Sipas mediave vendase, vendet e ofruara për janarin 2026 u rezervuan plotësisht që në dhjetor.

Megjithatë, operatori i Gopeng Sanctuary njoftoi më pas pezullimin e aktivitetit deri në një njoftim tjetër.

Ndërkohë, një qendër tjetër në të njëjtën zonë, Heartfield Sanctuary, ka ofruar programe për të rinjtë dhe të rriturit që kërkojnë të shkëputen përkohësisht nga presioni i përditshëm.

Sipas gazetës malajziane Malay Mail, grupi i parë i kësaj qendre, në dhjetor 2025, përbëhej nga 15 persona, të cilët qëndruan për rreth një muaj.

Qendra ofron programe të ndryshme që përfshijnë akomodim, ushqim dhe aktivitete të organizuara, me tarifa që variojnë sipas shërbimeve. /skyweb.al