Mediat greke jehonë arrestimit të grabitësit të bankave/ Nga 28 grabitjet e dyshuara në Greqi te 75 mijë eurot, detaje nga e shkuara e 50-vjeçarit

Në prangat e policisë shqiptare ka rënë 50-vjeçari Robert Duka, i njohur edhe si Albert Duka, i akuzuar për dy grabitje të armatosura të bankave në Tiranë brenda një periudhe pesëmujore, me një shumë të grabitur prej rreth 75 mijë eurosh.

I arrestuari ka qenë më parë edhe në vëmendjen e autoriteteve greke, pasi ishte akuzuar për pjesëmarrje në një grup të strukturuar kriminal, që dyshohet se ishte përfshirë në 28 grabitje bankash në Greqi.

50-vjeçari, me origjinë nga Vlora, u arrestua në kuadër të një operacioni policor të koduar “Bank Robber” (Grabitësi i Bankave), pas hetimeve që e lidhën me dy grabitje të kryera më 2 qershor dhe 2 nëntor 2026, në degë bankash në zonën e Komunës së Parisit në Tiranë.

Sipas njoftimit të Policisë së Shtetit, lokalizimi dhe identifikimi i tij u bë i mundur përmes metodave të posaçme hetimore, sistemeve teknologjike të identifikimit dhe analizimit të veshjeve të përdorura gjatë grabitjeve.

Me skuter elektrik dhe armë, hyri për të grabitur bankën

Grabitja më e fundit u regjistrua më 2 nëntor, rreth orës 10:45 të paradites, kur një person i veshur me të zeza, me një kaskë motoçiklete në kokë dhe një objekt që ngjante me armë zjarri në dorë, hyri me forcë në një degë bankare.

Pamjet e kamerave të sigurisë kanë filmuar momentin kur autori mbërrin me një skuter elektrik, hyn në bankë dhe mbyll derën me çelës, duke penguar daljen e qytetarëve që ndodheshin brenda.

 Më pas, ai drejton armën nga punonjësi i sigurisë së bankës, e kërcënon dhe shkon drejt sportelit, ku i kërkon punonjëses t'i dorëzojë paratë.

Pasi merr rreth 60 mijë euro në valuta të ndryshme, autori largohet nga banka dhe arratiset me skuterin elektrik.

Pesë muaj më herët, më 2 qershor, ishte kryer një tjetër grabitje e armatosur në një bankë tjetër të së njëjtës zonë, ku autori kishte marrë rreth 15 mijë euro.

Lidhja me 28 grabitje bankash në Greqi

Interes të veçantë paraqet e kaluara kriminale e 50-vjeçarit. Sipas medias shqiptare Shqiptarja.com, ai ishte akuzuar në Greqi për pjesëmarrje në një grup të strukturuar kriminal, i cili dyshohet se kishte kryer 28 grabitje bankash.

Autoritetet shqiptare dyshohet se e kishin mbajtur nën vëzhgim për disa ditë, pasi kishin dyshime se ai po planifikonte të rikthehej në Greqi.

Sipas të njëjtit burim, bashkëshortja e tij punon në një institucion tjetër bankar në Shqipëri. Sekuestrohen 8,200 euro dhe rrobat e përdorura gjatë grabitjeve

50-vjeçari u lokalizua dhe u arrestua pranë rrugës së Kosovarëve, në kryeqytetin shqiptar.

Gjatë kontrolleve policore, autoritetet sekuestruan 8,200 euro, dy telefona celularë dhe veshje që dyshohet se ishin përdorur prej tij gjatë kryerjes së grabitjeve.

Drejtori i Policisë së Tiranës, Oliger Torba, deklaroi se zbardhja e dy ngjarjeve u bë e mundur falë përdorimit të mjeteve moderne teknologjike, të cilat mundësuan identifikimin e të dyshuarit, pavarësisht përpjekjeve të tij për të fshehur tiparet e fytyrës.

Arrestimin e tij e përshëndeti edhe ministri i Brendshëm i Shqipërisë, Ervin Demo, i cili theksoi se përdorimi i maskës nuk mund të garantojë shmangien e arrestimit. Hetimet vijojnë për zbardhjen e plotë të dy grabitjeve dhe dokumentimin e përfshirjes së të arrestuarit në këto ngjarje. /PiranjatNews/