Është shtuar numri i qytetarëve të mbledhur përballë Kryeministrisë, ndërsa situata paraqitet e qetë, pa incidente ...
POLITIKE
Bardhi-Ramës: Për Ballukun kërkon prezumimin e pafajësisë, ndërsa protestuesit i shpall fajtorë pa prova
PiranjatPërditësimi i fundit 23 Tetor 2026, 18:03
Kryetari i Grupit Parlamentar të Partisë Demokratike, Gazment Bardhi, ka reaguar pas deklaratave të kryeministrit Edi Rama për studentët protestues, duke e akuzuar atë se, në mungesë të përgjigjeve për kërkesat e të rinjve, zgjedh t’i baltosë dhe t’i sulmojë.
Në reagimin e tij, Bardhi shprehet se Rama duhet të kishte verifikuar më parë të kaluarën dhe integritetin e zëvendëskryeministrave, ministrave, deputetëve, kryetarëve të bashkive dhe drejtuesve të institucioneve që ka emëruar.
Sipas Bardhit, për të ruajtur pushtetin, kryeministri ka qenë i gatshëm të promovojë individë të lidhur, siç pretendon ai, me krimin e organizuar, ndërsa kundërshtarët politikë dhe qytetarët që i konsideron kërcënim për pushtetin e tij përpiqet t’i kriminalizojë.
Kur nuk ke përgjigje për kërkesat e rinisë, rruga më e lehtë është baltosja dhe shpifja! Por faktet flasin vetë!
Po të ishte kujdesur Edi Rama të verifikonte të kaluarën dhe integritetin e zëvendëskryeministrave, ministrave, deputetëve, kryetarëve të bashkive dhe drejtorëve të tij, Shqipëria nuk do të ishte katandisur në këtë gjendje.
Por, për të ruajtur pushtetin, ai ka dëshmuar se është i gatshëm të ngrejë në majat e qeverisjes individë të lidhur me krimin e organizuar. Ndërsa, për të goditur këdo që e konsideron kërcënim për pushtetin e tij, është i gatshëm të përdorë çdo mjet, deri në përpjekjet për të kriminalizuar kundërshtarët dhe qytetarët shqiptarë.
Për Belinda Ballukun, Erion Veliajn, Mirlinda Kaçanajn, Vlora Hysenin apo Ergys Agasin, na këshillon të mos flasim dhe t’i prezumojmë të pafajshëm, ndërsa qytetarët që protestojnë kërkon t’i shpallim fajtorë pa prova dhe pa një vendim gjykate.
Për Edi Ramën, pushteti duket se ka qenë gjithmonë më i rëndësishëm se integriteti, përgjegjësia dhe interesi i qytetarëve. Pikërisht kjo është një nga arsyet pse Shqipëria ndodhet sot në këtë gjendje.
