“
Janë aktualisht 7 efektivë të pezulluar nga vetë Policia e Shtetit, të cilët i janë shtruar hetimit nga Agjencia e...
AKTUALITET
Shqiptarë në rrjetin e ‘bankës së fshehtë’ në Itali, 30 të arrestuar dhe mbi 21 milionë euro pasuri të sekuestruara
PiranjatPërditësimi i fundit 23 Tetor 2026, 19:49
Bashkëpunëtorë shqiptarë dyshohet se kishin lidhje me strukturën financiare të organizatës që pastronte para përmes kompanive fiktive dhe kriptomonedhave. Në hetim janë zbuluar fatura të dyshuara fiktive me vlerë mbi 110 milionë euro dhe transaksione ndërkombëtare prej 68 milionë eurosh.
Bashkëpunëtorë shqiptarë janë përfshirë në një hetim të gjerë në Itali kundër një organizate të dyshuar kriminale, e cila akuzohet për pastrim parash dhe evazion fiskal përmes një rrjeti kompanish fiktive, transfertash ndërkombëtare dhe kriptomonedhash.
Operacioni i Guardia di Finanza ka çuar në 30 arrestime dhe sekuestrimin e pasurive me vlerë mbi 21 milionë euro. Sipas autoriteteve italiane, shqiptarët e dyshuar kanë pasur lidhje me strukturën financiare të rrjetit, ndërsa hetimet vijojnë për të përcaktuar rolin konkret të secilit prej personave të përfshirë.
Në qendër të hetimit është zbulimi i një të ashtuquajture ‘bankë e fshehtë’ në zonën e Peros, mes Milanos dhe provincës së saj. Struktura dyshohet se funksiononte nën mbulesën e një kompanie për dhënien me qira të automjeteve dhe ofronte shërbime financiare jashtë sistemit zyrtar bankar.
Sipas mediave italiane, hetuesit kanë zbuluar fatura të dyshuara fiktive me vlerë mbi 110 milionë euro, si dhe operacione të dyshuara të pastrimit ndërkombëtar të parave që arrijnë në 68 milionë euro.
Skema dyshohet se funksiononte përmes kompanive që lëshonin fatura për transaksione që nuk kishin ndodhur realisht. Pas marrjes së pagesave, paratë u ktheheshin klientëve në para të gatshme ose transferoheshin në llogari jashtë vendit dhe në kriptomonedha, me qëllim fshehjen e origjinës së tyre.
Sipas hetuesve, paratë dyshohet se vinin kryesisht nga mashtrimet fiskale, por edhe nga trafiku ndërkombëtar i drogës dhe armëve.
Në hetim janë përfshirë persona që dyshohet se kishin lidhje me organizata të njohura mafioze italiane, përfshirë 'Ndrangheta-n, Camorra-n dhe Mafian e Katërt.
Një tjetër zhvillim i operacionit ishte arrestimi në Lugano të Zvicrës i një menaxheri 62-vjeçar, shtetas italian, i cili dyshohet se ndihmonte në administrimin e flukseve financiare dhe transferimin e parave përmes kompanive të huaja dhe platformave të kriptomonedhave. Ai akuzohet për pjesëmarrje në organizatë kriminale, me rrethana rënduese të lidhura me metodën mafioze, dhe është ndaluar me qëllim ekstradimin.
Në operacion morën pjesë më shumë se 350 efektivë të Guardia di Finanza, të cilët kryen kontrolle në disa zona të Italisë dhe në kantonin e Ticinos në Zvicër.
Gjatë ndërhyrjeve u sekuestruan para, llogari bankare, kriptomonedha, automjete, varka, bizhuteri, ora luksoze dhe pajisje për numërimin e parave.
Hetimet vijojnë për të zbardhur plotësisht skemën financiare, lidhjet e saj ndërkombëtare dhe rolin e personave të dyshuar, përfshirë bashkëpunëtorët shqiptarë.
