Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
POLITIKE
"Ne do pastrojmë vendin", Rama: Kushdo që mundohet të hajë pas shpine të shkojë aty ku e meriton
r.llPërditësimi i fundit 8 Mars 2025, 12:43
TIRANË- Kryeministri Edi Rama gjatë fjalës së tij në takimin me gratë dhe vajzat socialiste u shpreh se me hyrjen në BE nuk do të ketë më aq shumë rëndësi kush qeveris. Rama tha se për momentin, fokusi është te lufta kundër korrupsionit dhe reforma në drejtësi. Ai u shpreh se Partia Socialiste dorëzoi te drejtësia shpatën e ndëshkimit që sipas tij dikur mbahej nga qeveria.
“Kur ne të hyjmë në BE nuk do të ketë më aq shumë rëndësi se kush qeveris këtu, por për momentin është themelore lufta kundër korrupsionit. Ne sot jemi në një situatë ku në Shqipëri po ndodh diçka që nuk ka ndodhur më parë, ndaj krijohet zhurmë dhe këneta shpërthen sa herë që lufta kundër korrupsionit drejtohet ndaj dikujt të lidhur me pushtetin e PS, por duhet vetëm shumë pak distancë e qetësi e arsyetim për të kuptuar që gjithçka që po ndodh është vepër e PS, nuk ka ndodhur më parë që nga 1912. Po ndodh sot sepse PS me vendosmëri bëri një reformë në drejtësi që nuk e ka bërë ende asnjë në rajon. Kur morëm detyrën ishim të fundit në trenin për në BE, ku janë tani ata? Ne jemi lokomotiva! Vendosëm të dorëzojmë tek drejtësia shpatën e ndëshkimit që më parë e kishte qeveria”, tha ai.
Teksa po fliste për luftën e drejtësisë kundër korrupsionit, e cila ka çuar në burg disa zyrtarë socialistë, Rama u shpreh se Partia Socialiste po pastron vendin. Ai shtoi se kushdo që mundohet "të hajë pas shpine" duhet të shkojë aty ku e meriton.
"Duam që paga mesatare të jetë ku e ku mbi 1000 euro, do ta arrijmë këtë në sektorin publik dhe privat. Dhe jini krenar edhe për atë që po ndodh në luftën kundër korrupsionit, mos i dëgjoni ata që thonë u kapën të gjithë, ne jemi, pa emigrantët afro 800 mijë, bashkë me emigrantët do ti afrohemi 1 mln. Kështu që njësoj si ju që kujdeseni për pastrimin e shtëpisë, edhe ne do të pastrojmë vendin tonë, ku kushdo që mundohet të hajë të tjrtrët mbas shpine të shkojë aty ku e meriton, kjo është rruga jonë,. Krenarë për PS, Shqipërinë, për të gjitha gratë shqiptare, nuk ka rendësi socialiste apo demokrate ju uroj të gjithave gëzuar 8 Marsin, të luftojmë të gjithë bashkë që gratë të bëhen më të forta dhe burrat më të mençur.", tha Rama.
