Sali Berisha deklaron se Belinda Balluku duhet të ishte prapa hekurave dhe jo të ecte e lirë. Në një komunikim me gazetarët, kre...
POLITIKE
“Shqiptarët s'janë talebanë”/ Berisha shpërthen ndaj Ramës: Mashtron për tenderat, manipulon integrimin dhe fyen kombin
PiranjatPërditësimi i fundit 17 Maj 2026, 15:06
Kreu i PD-së, Sali Berisha, reagoi përmes një videomesazhi ndaj deklaratave të kryeministrit Edi Rama, duke e akuzuar për manipulim të fakteve dhe përhapje të gënjeshtrave në lidhje me tenderat publikë, integrimin europian dhe raportet me Rusinë.
Berisha u ndal te raportet për tenderat publikë në Shqipëri, ku sipas tij vendi ka pësuar rënie të fortë në transparencë dhe standarde gjatë viteve të fundit.
Ai foli edhe për tendera sekretë dhe përfitime që, sipas tij, lidhen me persona pranë kryeministrit.
Një pjesë e reagimit lidhej me deklaratat e Ramës në një konferencë në Tallinn, ku Berisha e kritikoi për krahasimin e shqiptarëve me talebanët.
Sipas tij, një krahasim i tillë është fyes për shqiptarët dhe nuk ka asnjë lidhje me historinë apo orientimin e vendit.
Në videomesazh, Berisha kundërshtoi edhe deklaratat e Ramës për mungesën e kontakteve mes Shqipërisë dhe Rusisë që nga vitet ’60.
Ai përmendi disa vizita zyrtare ndër vite, përfshirë edhe vizitën e ministrit rus të Jashtëm, Sergei Lavrov, në Shqipëri në vitin 2004.
Sa i përket integrimit në Bashkimi Europian, Berisha tha se opozita e mbështet procesin për arsye gjeopolitike, por sipas tij Shqipëria ende nuk plotëson standardet për anëtarësim. Ai shtoi se rezoluta e votuar në Kuvend nuk përmban vlerësime për punën e qeverisë, por vetëm kërkesa dhe detyrime që lidhen me procesin e integrimit europian.
Reagimi:
Të dashur qytetarë dhe qytetare! Sot përsëri në monologun e tij të së dielës, Edi Rama lëshoi serialin e gënjeshtrave dhe trillimeve. Kështu, pasi u damkos nga institucioni i Tender Europe, i cili në vlerësimet e tenderave në 38 vende gjeti se Shqipëria kishte një rënie dramatike nga viti 2010 gjer në vitin 2026, nga 80 pikë që kishte në vitin 2010-2013, bie në 64 pikë në vitin 2026 dhe secili nga ju mund të shohë këtë grafik të këtij institucioni. Përveç kësaj, Europe Tender gjen se transparenca ka rënë në 50 pikë dhe dramatike është se flamujt e kuq kanë 40% të tenderave dhe në këtë kontekst rikujtoj këtu se është baxhanaku i Edi Ramës që ka fituar qindra tendera sekrete në kundërshtim me ligjin dhe vetëm në një vit ka marrë 800 transaksione pagesa nga thesari i shtetit. Pra, një gënjeshtër sa më shumë të përsëritet bëhet aq më e zezë dhe nuk bëhet e vërtetë. Së dyti, në monologun e tij, ai u ndal tek një konferencë e zhvilluar në Talin, ku në mënyrën më të papërgjegjshme krahasoi, pa u skuqur, pa u zverdhur shqiptarët me talebanët, duke u përpjekur të jetë interesant se shqiptarët janë në besimin e tyre të perëndimit si talebanët e Europës. Asgjë s'i lidh shqiptarët me talebanët. Nuk i lidh as e shkuara, as besimi i tyre, as politika dhe asgjë tjetër. Ata janë një organizatë terroriste e damkosur dhe krahasimi i kombit tënd me një organizatë si ajo, të tregon se je një njeri i shpërlarë, që je i gatshëm të thuash çdo fjalë për t'u bërë interesant. Po në këtë konferencë, mori përgjigjen që meriton, lideri apo për të mos thënë budallai global. Moderuesi i konferencës hodhi poshtë tezat e tij, këshillat e tij për Europën dhe kjo hedhje poshtë u duartrokit nga audienca, çka e nervozoi shumë Edi Ramën dhe harroi se është një konferencë ndërkombëtare, filloi të thotë se nuk kam thënë këtë apo atë. Përveç kësaj, po në këtë konferencë, përsëriti gënjeshtrën e tij banale se nga vitet '60 gjer sot nga Shqipëria dhe Rusia nuk kanë patur asnjë shkëmbim vizite, në një kohë kur kanë qenë të paktën mbi 12 vizita, ndër të cilat të niveleve president, kryeministra, kryetarë parlamentesh dhe vetë Sergei Lavrov, në vitin 2004, ka ardhur në Shqipëri dhe ka iniciuar me Partinë e Edi Ramës traktatin e miqësisë. Në monologun e tij, ndër të tjera, u ndal dhe tek rezoluta që u votua në parlament, duke pretenduar se opozita e votoi pasi konstatoi se po zhbllokohet IBAR. E vërteta është se, opozita ka një tezë nga e cila nuk lëviz, se Shqipëria përveç kriterit gjeopolitik nuk plotëson absolutisht asnjë kriter për anëtarësimin në Bashkimin Europian, por opozita e mbështet këtë proces si një proces të diktuar nga gjeopolitika dhe kurrë ndonjëherë nuk ka menduar dhe nuk mendon të bllokojë procesin. Rezoluta nga alfa tek omega nuk ka asnjë fjalë vlerësimi për punën e qeverisë apo të parlamentit, por thjesht rreshton kërkesat dhe detyrat të domosdoshme për procesin e integrimit.
