Në mbështetje të studentëve që protestojnë para Ministrisë së Arsimit, protestës i është bashkuar edhe ...
POLITIKE
Tabaku: Shteti po rrit të ardhurat duke marrë më shumë nga shtresa e mesme
PiranjatPërditësimi i fundit 6 Prill 2026, 13:25
Deputetja e Partisë Demokratike, Jorida Tabaku, ngriti sot shqetësimin mbi modelin aktual ekonomik në Shqipëri, duke theksuar se rritja nuk po mbështetet tek prodhimi dhe sektorët realë të ekonomisë.
Përmes një postimi në rrjetet sociale, Tabaku theksoi se sot rritja ekonomike nuk vjen nga prodhimi, por kryesisht nga ndërtimi dhe nga zgjerimi i shtetit, duke shtuar se këta dy sektorë përbëjnë rreth dy të tretat e rritjes ekonomike në vend.
Sipas saj, sektorët si “bujqësia dhe industria, që mbajnë në këmbë ekonominë reale, janë në rënie prej vitesh”.
Tabaku shtoi gjithashtu se “rreth 78% e rritjes së të ardhurave buxhetore vjen nga tatimi mbi pagat dhe kontributet”.
“Shteti po rrit të ardhurat duke marrë më shumë nga e njëjta shtresë shtresa e mesme dhe profesionistët jo duke zgjeruar ekonominë reale”, theksoi ai.
Sipas deputetes “sektorët që duhet të sillnin të ardhura, ndërtimi dhe turizmi, nuk kontribuojnë proporcionalisht me fitimet që gjenerojnë”.
Sa i përket pagave, Tabaku theksoi se rritja e tyre nuk lidhet me zhvillim të qëndrueshëm ekonomik.
“Pagat rriten në letër, por jo si rezultat i një ekonomie më të fortë. Ato nuk vijnë nga produktiviteti dhe konkurrenca, ndaj nuk përkthehen në më shumë mirëqenie për shumicën”, tha ajo.
Tabaku u ndal edhe tek korrupsioni, teksa shtoi se “investimet nuk shkojnë aty ku ka nevojë ekonomia, por aty ku ka interesa të ngushta. Dhe kjo deformon gjithçka, nga çmimet te mundësitë”.
Tabaku bëri thirrje për ndryshim të modelit ekonomik.
“Shqipëria ka nevojë për një model tjetër. Një model që prodhon, që konkurron dhe që e kthen rritjen ekonomike në mirëqenie për çdo qytetar”, tha ajo.
