Zonat malore në qarkun e Kukësit po përjetojnë kushte klimaterike dimërore, ndonëse jemi ende në fund të muajit tetor.
...
AKTUALITET
‘Shqiptari’ akuzohet si kreu i bandës së rrëmbyesve, në gjyq për pengmarrjen e tre të rinjve
PiranjatPërditësimi i fundit 28 October 2026, 20:10
Një 23-vjeçar, i njohur me nofkën ‘Shqiptari’, dhe dhjetë të tjerë nga rajoni i Lionit po gjykohen në qytetin e Bourges, në Francë, për rrëmbimin dhe mbajtjen peng të tre të miturve në mars të vitit 2023. Sipas mediave franceze, ngjarja dyshohet se ka pasur si motiv një borxh prej 7 mijë eurosh të lidhur me trafikun e drogës.
I riu, i cili paraqitet si drejtuesi i një grupi të quajtur ‘klani i lionasve’, akuzohet se ka organizuar veprimet së bashku me dhjetë persona të tjerë, të moshës 22 deri në 28 vjeç. Procesi gjyqësor ka nisur më 27 tetor në gjykatën penale të Bourges dhe pritet të shqyrtojë rolin e secilit prej të pandehurve në ngjarje.
Sipas raportimeve të mediave franceze, më 2 mars 2023, 23-vjeçari dhe dy bashkëpunëtorë të dyshuar shkuan në Bourges me një automjet tip ‘Renault Clio’ dhe morën me vete një 15-vjeçar, të identifikuar si Kenzo. Pas dërgimit të tij në rajonin e Lionit, i mituri u kthye sërish në Bourges.
Në natën mes 3 dhe 4 marsit, një grup prej 11 personash, të ndarë në tri automjete, u kthye në Bourges. Sipas akuzave, ata hynë me forcë në një apartament, ku kapën dy të mitur, i dhunuan dhe i mbyllën në bagazhet e dy makinave, për t'i transportuar më pas drejt Lionit.
Dy të miturit u dërguan në një dhomë hoteli të zinxhirit ‘Formule 1’, në rajonin e Lionit, sipas raportimit të mediave franceze.
Çështja lidhet me ngjarje të ndodhura gjatë periudhës 2–9 mars 2023. Sipas raportimeve, grupi i të dyshuarve i ka shpëtuar gjykimit në gjykatën e krimeve të rënda dhe po përballet me procesin në gjykatën penale të Bourges.
Procesi pritet të zgjasë pesë ditë dhe të përcaktojë përgjegjësitë individuale të 11 të pandehurve për rrëmbimin, mbajtjen peng dhe privimin e paligjshëm të lirisë së tre të miturve.
