Skandali i Ueno Bank rrëzon presidentin e Paraguait, Santiago Peña jep dorëheqjen pas falimentimit të bankës dixhitale

Presidenti i Paraguait, Santiago Peña, ka njoftuar dorëheqjen nga posti, pas krizës politike dhe financiare që shkaktoi falimentimi i bankës dixhitale Ueno Bank. Skandali ka ngritur dyshime për përdorimin e parregullt të fondeve publike, kreditimin e kompanive të lidhura me grupin financiar dhe përgjegjësinë e institucioneve që mbikëqyrnin aktivitetin e bankës.

Në një mesazh të publikuar në platformën X, Peña deklaroi se vendimi për t'u larguar synon të mbrojë stabilitetin e vendit dhe institucionet demokratike.

“Kam marrë vendimin të paraqes dorëheqjen me synimin për të ruajtur institucionet dhe paqen sociale”, deklaroi presidenti.

“Dëshira ime më e madhe është të garantohet kthimi i këtyre fondeve, që Fondi i Garancisë së Depozitave të përmbushë misionin e tij dhe që fondet publike, si dhe burimet që u përkasin të gjithë paraguajanëve, të mbrohen”, shtoi Peña.

Dorëheqja erdhi në një moment kur presidenti ishte shumë pranë shkarkimit përmes procedurës parlamentare të fajësimit, e njohur si impeachment. Situata e tij politike ishte përkeqësuar ndjeshëm pasi edhe Partia Colorado, forca politike që e solli në pushtet, iu bashkua nismës së opozitës për shkarkimin e tij.

Në qendër të krizës qëndron Ueno Bank, një institucion financiar që ishte zgjeruar me shpejtësi në tregun paraguajan, duke u kthyer në një nga bankat kryesore dixhitale të vendit. Me afro tre milionë klientë, banka administronte kursimet e një pjese të konsiderueshme të popullsisë dhe kishte marrëdhënie financiare me institucione të rëndësishme shtetërore.

 
Banka Qendrore e Paraguait ndërhyri në aktivitetin e Ueno Bank më 2 nëntor, pasi konstatoi se treguesit e aftësisë paguese kishin rënë nën kufijtë e kërkuar ligjërisht. Kontrollet zbuluan probleme serioze në cilësinë e aktiveve, operacione me kompani të lidhura dhe mangësi në raportimin e gjendjes reale financiare.

Sipas të dhënave të raportuara, banka administronte rreth 2,8 miliardë dollarë depozita, ndërsa ekspozimi i fondeve publike ndaj saj vlerësohej në rreth 800 deri në 850 milionë dollarë. Një pjesë e konsiderueshme e këtyre fondeve lidhej me institucionet shtetërore të pensioneve dhe sigurimeve shëndetësore.