Sot dueli vendimtar! Shqipëria për “hakmarrje” ndaj Finlandës

Mbrëmjen e kësaj të enjte, Shqipëria do të luajë një ndeshje shumë të rëndësishme ndaj Finlandës, në grupin C1 të Ligës së Kombeve.  Objektivi i vetëm i djemve të drejtuar nga Rolando Maran është konsolidimi i vendit të parë në grup.

Shqipëria vjen si kryesuese, duke numëruar nëntë pikë në katër takime. Kuqezinjtë lënë pas finlandezët dhe Bjellorusinë, të cilat ndajnë vendin e dytë me nga shtatë pikë.

Kjo përballje pritet të jetë një festë e vërtetë, pasi të gjitha biletat e stadiumit janë shitur prej ditësh. Por përveç entuziazmit, kjo ndeshje ka shijen e një "hakmarrjeje" të pastër sportive.

Më 3 tetor, në stadiumin olimpik të Helsinkit, Shqipëria pësoi disfatën e saj të vetme në këtë grup. Ndeshja filloi shkëlqyeshëm me golin e Rei Manajt pas asistit nga Kristjan Asllani.

Megjithatë, kartoni i kuq i marrë nga portieri Etrit Berisha ndryshoi tërësisht fatin e atij takimi. Me një lojtar më pak, kuqezinjtë u ndëshkuan dy herë nga goditjet standarde të ekzekutuara nga Valta.

Pikërisht goditjet e dënimit mbeten arma më e fortë e kundërshtarit nordik që duhet patur në konsideratë. Një tjetër element që e bën jetike fitoren, është edhe historia negative me këtë kombëtare.

Në tetë përballje direkte të luajtura ndër vite, Finlanda ka fituar pesë prej tyre. Fitorja e fundit dhe e vetme zyrtare e Shqipërisë daton plot 46 vite më parë, në vitin e largët 1980.

Shqipëri-Finlandë, do të luhet mbrëmjen e kësaj të enjte, duke nisur nga ora 20:45, në stadiumin “Air Albania”.