Kryeministri Edi Rama ka publikuar një pasqyrë të protestave në disa vende, ku përfshihet edhe Shqipëria, duke krahasuar numrin e ...
SPORT
“San Siro”-ja i ri! Interi dhe Milani prezantojnë projektin e stadiumit më 29 tetor! Arenë me 71500 vende dhe hapësira premium
PiranjatPërditësimi i fundit 22 Tetor 2026, 14:43
Interi dhe Milani do të prezantojnë më 29 tetor projektin e stadiumit të ri, një investim prej 2.3 miliardë eurosh që do të ndryshojë të ardhmen e futbollit në Milano. Impianti i ri do të ketë 71 mijë e 500 vende dhe synohet të përfundojë në vitin 2031, për të qenë gati për Euro 2032.
Interi dhe Milani janë gati të prezantojnë projektin e stadiumit të ri, një investim që synon të hapë një kapitull të ri për futbollin në Milano dhe të bashkojë historinë e dy klubeve me kërkesat e futbollit modern.
Prezantimi zyrtar është planifikuar më 29 tetor, në Kështjellën Sforza, ku do të publikohen pamjet e para të impiantit të ri, të projektuar nga studio të specializuara.
Stadiumi do të ketë një kapacitet prej 71 mijë e 500 vendesh, mes të cilave më shumë se 13 mijë do të jenë vende premium. Projekti parashikon një investim të përgjithshëm prej 2.3 miliardë eurosh, ndërsa rreth 700 milionë euro do të përdoren vetëm për ndërtimin e arenës sportive.
Kompleksi nuk do të kufizohet vetëm te futbolli. Në të parashikohen hapësira tregtare, restorante dhe zona argëtimi, me synimin për ta kthyer zonën në një qendër të rëndësishme aktivitetesh edhe jashtë ditëve të ndeshjeve.
Sipas planit, procedurat e miratimit duhet të përfundojnë deri në verën e vitit 2027. Nëse afatet respektohen, punimet mund të nisin gjatë gjysmës së dytë të po atij viti.
Përfundimi i stadiumit parashikohet në vitin 2031, duke krijuar mundësinë që impianti të jetë kandidat për organizimin e ndeshjeve të Kampionatit Evropian, Euro 2032.
Ndërkohë, stadiumi historik San Siro do të pësojë shembje të pjesshme, për t’i hapur rrugë transformimit të zonës.
Një projekt me përmasa të mëdha, që synon të ruajë lidhjen me traditën sportive të Milanos, ndërsa krijon një stadium të ri për dekadat e ardhshme.
