Kim Kardashian ka rrëfyer se kishte dyshime përpara martesës me ish-basketbollistin e NBA-së, Kris Humphries, por vendosi të vaz...
BOTA
WSJ: Marrëveshja e Trump me Putinin nuk jep rezultat, çmimet e naftës në SHBA vijojnë të rriten
PiranjatPërditësimi i fundit 28 October 2026, 19:57
Marrëveshja mes presidentit amerikan Donald Trump dhe homologut rus Vladimir Putin për furnizimin e tregut me naftë ruse nuk ka arritur të ulë çmimet e karburanteve në Shtetet e Bashkuara. Pavarësisht premtimeve të Shtëpisë së Bardhë për lehtësimin e kostove të energjisë, amerikanët po paguajnë gjithnjë e më shumë për naftën, ndërsa analistët paralajmërojnë se marrëveshja mund të ketë ndikim shumë të kufizuar.
Sipas raportimeve të The Wall Street Journal, që prej njoftimit të marrëveshjes, çmimi mesatar i një galoni naftë (diesel) në SHBA është rritur nga 6.28 dollarë në 6.35 dollarë, sipas të dhënave të Shoqatës Amerikane të Automobilave (AAA).
Më 9 tetor, Trump njoftoi se kishte arritur një marrëveshje me Putinin për të rikthyer furnizimet ruse me naftë në tregun amerikan dhe atë ndërkombëtar, me synimin për të frenuar rritjen e çmimeve të shkaktuar nga lufta në Iran dhe ndërprerjet e furnizimeve globale.
Sipas marrëveshjes, Rusia u angazhua të eksportojë menjëherë mbi 300 mijë tonë naftë, të ndjekura nga 500 mijë tonë të tjera gjatë nëntorit dhe një milion tonë në fazën pasuese. Për të mundësuar furnizimet, administrata amerikane pezulloi përkohësisht disa sanksione ndaj produkteve ruse të naftës.
Megjithatë, ekspertët e tregjeve energjetike dyshojnë se sasitë e premtuara do të jenë të mjaftueshme për të ndikuar ndjeshëm në çmimet që paguajnë konsumatorët amerikanë.
Një nga problemet kryesore lidhet me kapacitetet e kufizuara të rafinerive ruse, disa prej të cilave janë dëmtuar nga sulmet ukrainase. Rusia është përballur gjithashtu me kufizime të eksporteve dhe nevojën për të garantuar furnizimin e tregut të brendshëm.
Sipas Reuters, rafineritë ruse kanë nisur të rrisin prodhimin gjatë tetorit, pasi autoritetet lejuan kuota të veçanta eksporti në kuadër të marrëveshjes me Uashingtonin. Megjithatë, mbetet e paqartë nëse Moska do të jetë në gjendje të përmbushë të gjitha sasitë e premtuara.
Ndërkohë, një cisternë me rreth 40 mijë tonë naftë ruse është nisur nga porti Primorsk në drejtim të Atlantikut, duke sinjalizuar përkohësisht Nju Jorkun si destinacion. Nëse ngarkesa mbërrin në SHBA, ajo do të shënojë një nga furnizimet e para të drejtpërdrejta që prej ndalimit të importeve ruse në vitin 2022.
Marrëveshja ka shkaktuar edhe kundërshtime politike në Uashington, pasi lehtësimi i sanksioneve mund t'i sigurojë Rusisë të ardhura shtesë në një kohë kur ajo vijon luftën kundër Ukrainës./PiranjatNews/
