“Air Albania” drejt ‘sold out’, zbulohet numri i biletave të shitura për ndeshjen Shqipëri-Finlandë

Interesi për sfidën Shqipëri-Finlandë është gjithnjë e më i madh. Ndeshja e programuar për t'u luajtur më 12 nëntor në stadiumin “Air Albania”, e vlefshme për raundin e pestë të Ligës së Kombeve, pritet të zhvillohet në një atmosferë elektrizuese.

Sipas informacioneve numri i biletave të shitura po i afrohet shifrës së 20 mijë. Një interes i jashtëzakonshëm nga tifozët kuqezi, që pritet të mbushin të gjithë sektorët e lejuar për ta, duke e çuar stadiumin drejt një tjetër “sold out”.

Por përtej atmosferës në tribuna, kjo është një ndeshje me peshë të madhe për Kombëtaren shqiptare. Kuqezinjtë kryesojnë grupin C1 dhe ndaj Finlandës duhet të shmangin me çdo kusht humbjen. Edhe një barazim do të ishte rezultat pozitiv, duke i lënë llogaritë përfundimtare për t'u zgjidhur në transfertën ndaj Bjellorusisë.

Objektivi i skuadrës së drejtuar nga Rolando Maran është i qartë: vendi i parë në grup. Një pozicion që do të kishte rëndësi të veçantë, pasi do t'i ofronte Shqipërisë një mundësi shtesë për të siguruar pjesëmarrjen në Europianin 2028 përmes fazës “play-off”.

Më 12 nëntor, Air Albania pritet të vishet kuqezi. Tifozët po bëjnë pjesën e tyre, ndërsa në fushë Kombëtares i duhet rezultati që afron një hap më shumë drejt objektivit madhor.