Arrestohet në Itali i kërkuari Vanxhel Balla, i dënuar për vrasje me paramendim

Policia e Shtetit finalizoi një fazë të re të operacionit të koduar “The Wanted”.

Në bashkëpunim me homologët italianë, u kap në Bolzano të Italisë shtetasi Vanxhel Balla, 28 vjeç, i dënuar me 12 vjet burg për vrasje me paramendim të kryer në bashkëpunim. Ai është arrestuar me qëllim ekstradimi drejt Shqipërisë.

Njoftimi i plotë:

Policia e Shtetit vijon bashkëpunimin e ngushtë me homologët ndërkombëtarë për kapjen dhe ekstradimin e shtetasve të shpallur në kërkim ndërkombëtar. Në kuadër të këtij bashkëpunimi, u finalizua një tjetër fazë e operacionit policor të koduar “The Wanted”.

Shtetasi Vanxhel Balla, 28 vjeç, i lindur në Dibër, u kap në Bolzano të Italisë. Ai ishte shpallur në kërkim ndërkombëtar nga Interpol Tirana, pasi Gjykata e Shkallës së Parë e Juridiksionit të Përgjithshëm Dibër e kishte dënuar në vitin 2020 me 12 vjet burg (mbetur për të kryer 9 vjet), për veprën penale “Vrasje me paramendim”, e kryer në bashkëpunim.

Sipas materialeve, Vanxhel Balla, së bashku me vëllain e tij (shtetasin A. B.), pas një konflikti për motive të dobëta, kishin vrarë me mjet prerës (thikë) shtetasin A. Z., alias I. Z.

Interpol Tirana, në bashkëpunim të ngushtë me Interpol Romën, po vijon procedurat për ekstradimin e këtij shtetasi drejt Shqipërisë./ Piranjat News