Tre vite pas arrestimit të Amant Josifit në Dubai, një dosje hetimore e ardhur nga Italia ka rikthyer në vëmendje aktivitetin e kompa...
AKTUALITET
Dosja italiane e call centerave në SPAK/ Bashkëshorti i Olta Xhaçkës, Artan Gaçi, në fokus të hetimeve për dyshime për pastrim parash
PiranjatPërditësimi i fundit 11 Tetor 2026, 11:19
Tre vite pas arrestimit të Amant Josifit në Dubai, një dosje hetimore e ardhur nga Italia ka rikthyer në vëmendje aktivitetin e kompanive të call centerave në Shqipëri. Në fokus të hetimeve të SPAK është ish-deputeti socialist Artan Gaçi, bashkëshorti i ish-ministres së Jashtme, Olta Xhaçka.
Lidhja mes kësaj çështjeje dhe dosjes së Amant Josifit lidhet me dyshimet për aktivitetin e qendrave të mashtrimit telefonik dhe emrat e personave që kanë pasur marrëdhënie me kompanitë e kësaj fushe. Amant Josifi, ish-këshilltar politik i Olta Xhaçkës gjatë kohës kur ajo drejtonte Ministrinë e Mbrojtjes, u arrestua në Dubai në vitin 2023. Ai ishte i lidhur me kompaninë “Milton Group”, e cila sipas hetimeve të SPAK në bashkëpunim me Eurojust dhe Europol, dyshohej se drejtonte gjashtë qendra mashtrimi telefonik në Shqipëri.
Sipas hetimeve, grupi dyshohet se u kishte shkaktuar qytetarëve gjermanë dëme prej rreth 6.1 milionë eurosh përmes skemave të mashtrimit. Operacioni ndërkombëtar “FRIDA-REFOX”, i zhvilluar më 8 dhe 9 nëntor, zbuloi përmasat e një rrjeti që dyshohet se kishte prekur rreth 200 mijë persona në Evropë. Kryesisht në Gjermani, Itali dhe Spanjë.
Ndërkohë, përgjimet e rreth 3 milionë emaileve nga autoritetet spanjolle ndihmuan hetuesit të identifikonin dhe të lidhnin më shumë se 470 faqe interneti me aktivitetin e qendrave të call centerave. Josifi u shpall në kërkim nga autoritetet spanjolle, ndërsa në Shqipëri u ndërmorën veprime hetimore ndaj personave të dyshuar si pjesë e grupit.
Dosja italiane e cila po hetohet nga SPAK vë në fokus Artan Gaçin, bashkëshortin e Olta Xhaçkës dhe lidhjet e tij me kompanitë RAKEHA dhe SUPREME. Kompani këto të përfshira në fushën e marketingut telefonik dhe call centerave. Më 8 tetor 2026, Gaçi u paraqit në SPAK, i shoqëruar nga avokati Gurali Braimllari.
Sipas dokumenteve, Gaçi ishte ortak i RAKEHA-s që prej themelimit në vitin 2006, ndërsa SUPREME u krijua në vitin 2017 me objekt marketingun telefonik dhe shërbimet call center. Dosja përmban dyshime për pastrim parash dhe aktivitet kriminal, ndërsa hetuesit po analizojnë transaksione bankare dhe komunikime të lidhura me çështjen.
