Elbasan, shtohen pacientët me reumatizëm, mjeku: Mosha e pacientëve është ulur

Në Elbasan janë shtuar personat që vuajnë nga sëmundjet reumatizmale. Mjeku Vinfald Çomo tregon se patologjitë kockore po prekin gjithnjë e më shumë edhe mosha të reja.

Sëmundjet reumatizmale po prekin një numër të lartë të pacientëve në vendin tonë, por shpesh ato zbulohen vonë, kjo edhe për arsye të mosnjohjes së shenjave që shoqërojnë të tilla sëmundje. Janë rreth 200 sëmundje të cilat prekin muskujt, kockat dhe tendinat. Mjeku reumatolog në spitalin rajonal të Elbasanit tregon se cilat janë disa nga simptomat që nuk duhet neglizhuar dhe që shpesh nga pacientët ngatërrohen me lodhjen.

Ekspozimi në diell apo frekuentimi i llixhave pa përcaktuar më parë llojin e sëmundjes mund të shkaktojë probleme serioze tek pacientët të cilët nuk marrin konsultë me mjek specialist përpara.

Mjeku thotë se nisur nga eksperienca mjekësore, numri më i lartë i pacientëve që diagnostikohen me një sëmundje reumatologjike, kryesisht autoimune, në qarkun e Elbasanit është në Librazhd dhe në qytetet veriore të vendit.

Ajo që vihet re me shqetësim nga specialistët lidhet me uljen e moshës së personave të cilët po preken nga sëmundjet reumatologjike.