Tërmeti i 2019-ës, Hava Isaku në Kurbin: 6 vite pa dritare, na thanë ta harronim

Një e moshuar nga Kurbini, banesa e së cilës u dëmtua nga tërmeti i 26 nëntorit 2019, rrëfen se prej gjashtë vitesh jeton pa dritare, ndërsa pavarësisht premtimeve për riparimin e banesës, ndihma nuk ka mbërritur.

Hava Isaku thotë se në fund i është komunikuar nga kryetarja e bashkisë se dritarja nuk do t’i vendosej.

Ndërkohë, dëmet e tjera në banesë janë riparuar nga nipi dhe fqinjët.

“Gjashtë vjet më kanë lënë pa dritare. Më vinte ujë nga lart. Mirë që nuk na kapi korenti”, rrëfen e moshuara.

"Në fund më erdhi kryetarja e bashkisë dhe më tha: “Harrojeni.” Nuk më erdhi keq për vete, por për burrin tim të sëmurë. Kur ia ka thënë këtë, ai është prekur menjëherë, sepse na kishin thënë që do të na sillnin dritare për ta rregulluar.

Por nuk erdhi më njeri. As nuk erdhi njeri të na shihte nëse ishim gjallë apo vdekur. Erdhi këtu dhe më tha: “A më njeh?” Pastaj i tha burrit tim: “Harrojeni dritaren, nuk jua vendosim.”

Gjashtë vjet më kanë lënë pa dritare. Muret m’i rregulluan nipi dhe komshinjtë. Më vinte ujë nga lart. Mirë që nuk na kapi korenti", tha Isaku.