Deputeti i Partia Demokratike Arian Ndoja ka qenë i ftuar në emisionin e mëngjesit ‘Kafe Shqeto’ në Syri tv.
Gjatë bised...
AKTUALITET
Kukës, dëmtohet rruga e lagjes Xhaferraj–Turraj, banorët prej 10 ditësh të izoluar
PiranjatPërditësimi i fundit 15 Janar 2026, 12:45
Prej më shumë se 10 ditësh, banorët e lagjes Xhaferraj–Turraj janë të izoluar për shkak të dëmtimeve të rrugës kryesore që i lidh ata me qytetin e Kukësit. Banorët bëjnë apel ndaj autoriteteve ti japin zgjidhje kësaj situate. Një tjetër shqetësim i ngritur prej tyre, ka të bëjë edhe me rrëshqitjet masive të dherave në zonë, të cilat po iu afrohen banesave, duke i vendosur në rrezik ato
Reshjet e dendura të shiut, kanë shkaktuar dëme serioze në rrugën kryesore të lagjes Xhaferraj–Turraj, një aks i rëndësishëm lidhës që siguron komunikimin e kësaj zone me qytetin e Kukësit përmes rrugës së Shishtavecit dhe Topojanit. Si pasojë e rrëshqitjes masive të dherave dhe inerteve, rruga është bllokuar plotësisht prej më shumë se 10 ditësh, duke lënë të izoluar rreth 50 familje. Banorët shprehen se situata po bëhet gjithnjë e më e vështirë, pasi mungesa e qarkullimit po ndikon drejtpërdrejt në jetën e përditshme
Një tjetër shqetësim serioz i tyre lidhet me sigurinë e banesave, pasi rrëshqitja e dherave është afruar shumë pranë shtëpive dhe ekziston frika se, në rast të reshjeve të tjera, situata mund të përkeqësohet edhe më tej. Ata kërkojnë ndërhyrje urgjente për marrjen e masave
Në mbështetje të shqetësimeve të banorëve ka dalë edhe kryetari i degës së Partisë Demokratike në Kukës, Rrahman Demaj. Ai thekson se situata është alarmante dhe se banorët e kësaj zone janë të izoluar prej ditësh, duke kërkuar reagim të menjëhershëm nga institucionet vendore.
Ndërkohë mëngjesi i kësaj të enjteje e ka gjetur qytetin e Kukësit të mbuluar nga një mjegull e dendur, duke reduktuar ndjeshëm fushëpamjen dhe duke vështirësuar lëvizjen e qytetarëve sidomos me automjete. Vështirësitë në qarkullim kanë qenë më të mëdha veçanërisht në zonat e larta malore ku ka ende prezencë dëbore në akset rrugore.
