Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
AKTUALITET
Skema e përfitimit familjar/ Arlinda Pogaj i ndan burrit miliona euro me paracaktim nga fondet shtetërore
PiranjatPërditësimi i fundit 7 Dhjetor 2025, 12:12
Një dyshe, burrë e grua, po bëjnë namin me fondet shtetërore. Gruaja është drejtoresha e një agjencie të rëndësishme, ndërkohë që burri është drejtues në një kompani që përfiton fonde shtetërore. Të dy, njëri jep e tjetri merr, dyshohet se kanë krijuar një skemë përfitimi familjar, që kap shifrat e miliona eurove.
Do të ndalemi te dy personazhe, ku më e njohura është padyshim Arlinda Pogaj, drejtoreshë e Operatorit të Blerjeve të Përqendruara, e cila shpall çdo ditë tendera me vlera të mëdha. Ndërkohë, bashkëshorti i saj, deri në shkrimin e këtij artikulli, është një emër i panjohur për publikun, por mjaft i njohur në qarqet e firmave private apo organet shtetërore.
Lidhjet e të dyve kanë sjellë një binom të pandarë, me dyshimet e mëdha se nga kjo skemë del i humbur vet shteti, në dëme të mëdha. Nëse Arlinda ka krijuar “klientët” e vetë te Operatori i Blerjeve të Përqendruara, bashkëshorti i saj, Edigeni, vijon të fitojë në mënyrën më të lehtë tenderat, nëpërmjet firmës Shpresa Al, ku ai është një drejtues i lartë.
Me profesion jurist dhe me lidhjet që ka krijuar bashkëshortja e tij në institucionet shtetërore, edhe Edigeni ka bërë institucionet shtetërore “klientët” e firmës. Në këto radhë do të ndalemi te një tender të shpallur nga Drejtoria e Përgjithshme e Pastrimit dhe Gjelbërimit, me një vlerë prej 2.5 milionë eurosh.
Faksimile: Njoftimi i tenderit të shpallur nga Drejtoria e Pastrim Gjelbërimit në Bashkinë e Tiranës
Ditët e fundit, drejtoresha e Pastrim Gjelbërimit në Tiranës, Liri Qoshi, ka shpallur një tender të majmë, duke e rritur nga procedura e fundit e vitit 2023. Duke qenë se tashmë Bashkia e Tiranës është pa “kokë”, Liria ka gjetur një “qoshe” dhe ka urdhëruar vartësit të rrisin në maksimum vlerën.
Në redaksinë e VoxNews kanë mbërritur informacione se tenderi është totalisht i paracaktuar dhe i destinuar për të shkuar te firma ku punon burri i Arlinda Pogajt. “E rritën vlerën për t’ia dhënë firmës Shpresa AL. Kjo firmë ka një drejtues, a jurist, që quhen Edigen Pogaj, burri i Arlinda Pogajt. Vetë Arlinda ka bërë manualet e institucioneve që blejnë mallra. Bëhen kot letrat, pasi fituesi dihet se kush është” tha për VoxNews një punonjës i Pastrim Gjelbërimit në kushte anonimati.
Më pas, redaksia jonë shfeltoi dhe hulumtoi për dokumente në Agjencinë e Prokurimit Publik, ku rezulton se kjo drejtori me adresë në rrugën “5 Maji” në Tiranë ka hapur në fund të muajit nëntor 2025 tenderin me objekt të kontratës “blerje karburant dhe vaj”, e ndarë në tre lote. E para, blerje gazoil, e dyta blerje benzine dhe e treta vlerja vajra dhe lubrifikantë dhe alkool frenash.
Vlera e tenderit është plot 239 milionë lekë, ose rreth 2.5 milionë euro. “Kohëzgjatja e kontratës/marrëveshjes kuadër për zbatimin e saj është 36 muaj” thuhet në dokumente. Por, lexoni pak me kujdes se kur do të shpallet fituesi. “Afati i fundit për paraqitjen dhe hapjen e ofertave është data 29 dhjetor 2025, në orën 10:00” vijon dokumenti.
Kur e gjithë vëmendja e njerëzve të thjeshtë është përgatitja e tryezës së natës së ndërrimit të viteve, për Lirinë, Edigenin apo Arlindën është bërja e një tenderi të radhës, me dyshimin e madh se procedura është e paracaktuar.
Faksimile: Tenderi i naftës i Drejtorisë së Përgjithshme të Pastrim Gjelbërimit në vitin 2023 u fitua nga Shpresa Al
VoxNews hulumtoi dokumente të vjetra të kësaj drejtorie, ku rezulton se e njëjta procedurë e zhvilluar në vitin 2023 është fituar nga firma Shpresa AL. Në atë kohë, Pastrim Gjelbërimi finalizoi tenderin “furnizim me lëndë djegëse për automjete diesel” me marrëveshje kuadër me afat 36 muaj.
Fondi limit ishte 172 milionë lekë, ndërkohë që në procedurë mori pjesë vetëm një ofertues dhe “SHPRESA-AL” shpk me nipt K31321021N. Kjo firmë e fitoi këtë tender me të njëjtën vlerë, 172 milionë lekë, duke marrë 100 % të fondit limit.
Faksimile: Tenderi i benzinës në vitin 2023 i shpallur nga Drejtoria e Pastrim Gjelbërimit u fitua sërish me 100 % të vlerës nga Shpresa AL
Jo vetëm tenderin e naftës, por e njëjta firmë fitoi edhe tenderin e benzinës. Kjo procedurë e vitit 2023 u fitua sërish me 100 % të fondit limit nga firma Shpresa Al, me dyshimin se ishte e paracaktuar. Ishte e vetme në garë dhe mori çdo qindarkë të akorduar. Vlera e akorduar nga Pastrim Gjelbërimi ishte 27.900.000 lekë dhe Shpresa Al ofroi po 27.900.000 lekë.
Faksimile: Tenderi i Pastrim Gjelbërimit i vitit 2022 u fitua sërish nga Shpresa Al
Duket se kompania Shpresa Al ka lidhje të forta në Drejtorinë e Pastrim Gjelbërimit, pasi i ka fituar lehtësisht tenderat. Lidhjet e Edigenit apo bashkëshortes së tij e kanë ndihmuar padyshim, teksa edhe në vitin 2022 firma Shpresa Al ka marrë tenderin e karburantit në këtë drejtori. Bëhet fjalë për një tender me vlerë rreth 100 mijë euro, ku sërish firma e fitoi me 100 % të vlerës.
