Një nënë nga Korça, Volsjana Plasa, denoncon se djali i saj 4-vjeçar është dhunuar nga edukatorja në kopshtin nr. ...
AKTUALITET
Vlora 5 ditë pa ujë/ Nisin hetimet për menaxhimin e rrjetit, sekuestrohen kamerat e një biznesi
PiranjatPërditësimi i fundit 5 Janar 2026, 11:26
Pas skandalit në Vlorë, ku banorët ndejtën më shumë se pesë ditë pa një pikë ujë në çezmat e tyre, duket se drejtësia po lëviz.
Defekti i rëndë në tubacionin kryesor 1000 mm, që solli ndërprerjen e furnizimit me ujë të mijëra familje, biznese dhe institucione publike, duke krijuar një situatë të papranueshme për një qytet turistik dhe qendër urbane si Vlora, ka sjellë veprimet e para procedurale lidhur me këtë ngjarje.
Sipas raportimeve për mediat, policia ka sekuestruar pamjet e kamerave të sigurisë të një subjekti privat pranë zonës ku ndodhi defekti, për të dokumentuar me saktësi momentin, rrethanat dhe çdo element që mund të ndihmojë në zbardhjen e plotë të ngjarjes. Këto pamje pritet t’i referohen Prokurorisë.
Po ashtu burime nga Policia dhe Prokuroria bëjnë me dije se çështja pritet të regjistrohet zyrtarisht për hetim, ndërsa fokusi do të jetë jo vetëm te shkaku teknik i defektit, por edhe te mënyra se si është menaxhuar rrjeti i ujësjellësit dhe përgjegjësitë institucionale për mirëmbajtjen e tij.
Hetimi do të synojë të përcaktojë nëse defekti ka ardhur si pasojë e amortizimit të tubacionit, mungesës së investimeve, neglizhencës në mirëmbajtje apo faktorëve të tjerë që mund të kenë ndikuar drejtpërdrejt në këtë situatë.
Ndërprerja e furnizimit me ujë për pesë ditë solli reagime të forta nga qytetarët, të cilët u përballën me vështirësi serioze në përditshmëri. Kjo problematikë nxiti gjithashtu dhe protesta të forta nga qytetarët.
