‘Ambasadorja që bënte ‘ligjin’ në Shqipëri’, Tare: E kishte zyrën afër tualetit

Studiuesi Auron Tare ka sjellë një episod nga përvoja e tij me ish-ambasadoren amerikane në Shqipëri, Yuri Kim, edhe pse ai vetë nuk e ka përmendur me emër.

Tare tregoi se diplomatja kishte pasur një ndikim të konsiderueshëm në Shqipëri, ku, sipas tij, vendimet apo qëndrimet e saj përgjithësisht gjenin zbatim.

Por, gjatë një vizite në Uashington, ai kishte konstatuar një realitet krejt të ndryshëm.

‘Nuk po ia them emrin, por ka qenë një zonjë këtu, ambasadore, unë kam pasur miqësi me të. Ka qenë një ambasadore e cila çfarë thoshte në Tiranë, në përgjithësi bëhej.

Kur kam qenë para disa vitesh në Washington, i thashë dua të pimë një kafe dhe më tha hajde në departament, se aty punonte, dhe kur u futa, ishte një korridor i gjatë, shumë i gjatë, dhe në fund të korridorit në një zyrë shumë të vogël, afër tualetit, ishte edhe ambasadorja amerikane në Shqipëri.

Ky është edhe interesi amerikan për Shqipërinë’, tha Tare në A2CNN.